ҮСХ-ноос аравдугаар сарын статистик үзүүлэлтийг ҮСХ-ны Өрхөд суурилсан судалгааны хэлтсийн дарга Л.Ундрал танилцуулж байна.

Манай улс 2024 оны эхний арван сард нийт 156 улстай худалдаа хийж, гадаад худалдааны нийт бараа эргэлт 23 тэрбум ам.долларт хүрсэн байна. Үүнээс экспорт 13 тэрбум ам.доллар, импорт 9.6 тэрбум ам.долларт хүрч, тэнцэл 3.6 тэрбум ам.долларын ашигтай гарчээ.

Mөнгөний нийлүүлэлт (M2) урьдчилсан гүйцэтгэлээр 42 их наяд төгрөг болж, өмнөх оны мөн үеэс 8 (24.9%) их наяд төгрөгөөр өсөхөд төгрөгийн хадгаламж 5.4 (34.9%) их наяд төгрөгөөр, төгрөгийн харилцах 2.6 (35.4%) их наяд төгрөгөөр өссөн нь нөлөөлжээ.

Улсын нэгдсэн төсвийн нийт орлого, тусламжийн хэмжээ 2024 оны эхний 10 сарын урьдчилсан гүйцэтгэлээр 25.5 их наяд төгрөгт хүрч, өмнөх оны мөн үеэс 5.7 (28.7%) их наяд төгрөг, тэнцвэржүүлсэн орлого тусламжийн хэмжээ 23.9 их наяд төгрөгт хүрч, 4.9 (25.9%) их наяд төгрөгөөр тус тус өссөн байна.

Ургац хураалтын явцын мэдээгээр улсын хэмжээнд 2024 оны 10 дугаар сарын байдлаар 431.3 мянган тонн үр тариа, 244.5 мянган тонн төмс, 229.5 мянган тонн хүнсний ногоо, 243.3 мянган тонн таримал тэжээл, 55.1 мянган тонн техникийн ургамал хурааж, 1039.0 мянган тонн хадлан, 25.1 мянган тонн гар тэжээл бэлтгэсэн байна.

Аюулт үзэгдэл, ослын тохиолдол 2024 оны эхний 10 сарын байдлаар 4469 удаа бүртгэгдэж, өмнөх оны мөн үеэс 868 (24.1%)-аар өссөн байна.

Улаанбаатар хотод 2024 оны 10 дугаар сарын байдлаар орон сууцны үнэ өмнөх оны мөн үеэс 13.1 хувиар, өмнөх сараас 1.6 хувиар тус тус өссөн байна.

Орон сууцны насжилтаар авч үзвэл шинэ орон сууцны үнэ өмнөх оны мөн үеэс 11.0 хувиар, өмнөх сараас 1.9 хувиар, хуучин орон сууцны үнэ өмнөх оны мөн үеэс 14.7 хувиар, өмнөх сараас 1.6 хувиар тус тус өссөн байна.