Энэ жилийн форумд "Байгууллагын нийгмийн маркетинг", "Байгууллагын нийгмийн хариуцлага", "Нийгмийн Энтерпрайз", "Филантропи" гэсэн сэдвүүдээр илтгэл тавьж, Монголд амжилттай хэрэгжсэн туршлагуудыг хуваалцах аж.

MMCG судалгааны компанийн гүйцэтгэх захирал Д.Бум-Эрдэнэ "Байгууллагын нийгмийн маркетинг" хэсгийн үндсэн илтгэгчээр оролцож байна.

Энэ хэсэгт оролцогчид:

Маамуу - Монгол Контент ХХК-ийн гүйцэтгэх захирал Г.Гантуяа

2017 оны тусгай олимпийн өвлийн наадмын маркетинг - Bat Solution Partners компанийн УЗ-ын дарга В.Ганзориг

Утааны орон - Монгол ТВ мэдээний албаны дарга Э.Лхагва

Боож үхлээ жагсаалын үр дүн - Утааны эсрэг ээж аавууд ТББ-ын гүйцэтгэх захирал Ц.Пүрэвхүү нар дээрх сэдвүүдээр өөрсдийн туршлагаас хуваалцах юм.

Монгол Контент ХХК-ийн гүйцэтгэх захирал Г.Гантуяа:

Маамуу төслийг бид 2016 оноос эхлүүлээд явж байна. Максимагийн судалгаанаас үзэхэд хүүхдийн контент тун хомс болсон байна. Өнгөрсөн жилийн байдлаар телевизүүдийн нийт эфирийн 8 хувийг хүүхдийн контент эзэлж байсан бол энэ жил нэг хувиар өссөн нь харагдана.

Асуудлын хувьд:

• Үндэсний, орчин үеийн контентын эрэл нэмэгдсэн
• Гаднын контенттой дүйцэх чанартай контентыг хэрэглэгчид шаарддаг болсон
• Зорилтот бүлэгт чиглэсэн орчин үеийн үндэсний контент хангалтгүй
• Дутагдалтай орон зайг нөхөх зэрэг шаардлага бидэнд тулгарчээ.

Тиймээс хүүхэд бүрт хүртээмжтэй хэлбэрээр, хүмүүжил, боловсрлын агуулгатай, эцэг эхийн оролцоог нэмэгдүүлсэн, үндэсний үйлдвэрлэгчдийг дэмжсэн аргаар ажиллах төслийг эхлүүлсэн нь Маамуу юм.

Эхний ээлжинд бид дөрвөн ангийг бэлэн болгоод, гаргах гээд ажиллаж байна. Өнгөрсөн жил бид хамгийн анхны алхмаар Маамуу комикийг зах зээлд нийлүүлж, өөрсдийн GoGo мэдээллийн агентлаг болон нийгмийн сүлжээгээр дамжуулан "Айл бүрт Маамуу" уриан дор маркетингаа хэрэгжүүлсэн.

Энэ маркетинг тун амжилттай болсон нэг шалтгаан нь эцэг, эхчүүдэд Монгол гэсэн агуулгатай, хүүхдэд зориулсан контент хэрэгцээтэй болсон байж. Одоо тавдугаар сарын сүүлээр бид Маамуу веб сайтаа хэрэглээнд нэвтрүүлэх гээд ажиллаж байна.

Маамуу төслийн дараа өөр олон олон хүүхдийн контентууд гарч ирэх байх гэж найдаж байгаа учраас бид 2022 он гэхэд манайд гарч буй контентуудын дунд Монгол дүрийн эзлэх хувь давамгай болно гэдэгт итгэлтэй байна.

“Bat Solution Partners” компанийн УЗ-ийн дарга В.Ганзориг:

Маркетинг гэдэг бол ҮНЭ цэнэ юм. Ингээд бидний нийгэмд байгаа олон төрлийн асуудлуудыг компаниуд, корпорациуд хамтдаа шийдвэрлэхээр ажиллаж үр дүнд нь Хамт үнэ цэнэ гэдэг зүйл бий болж байна.

Нийгмийн маркетингийн хөгжил доорх дөрвөн шат дарааллын дагуу хөгжжээ:

Бидний асуудал биш – Анх компаниуд нийгмийн маркетингийг тоодоггүй байсан

Бидний асуудал мөн – Удалгүй тоож, ойлгож эхэлсэн

Асуудлыг хамтдаа шийдье – Яваандаа асуудлуудыг хамтран шийдвэрлэхээр бусадтай нэгдэж эхэлсэн

Энэ бол бизнесийн боломж – Ингээд одоо амжилттай яваа компаниуд нийгмийн төлөө асуудлыг шийдвэрлэх нь борлуулалтаа нэмэгдүүлдэг, нэр төрөө өсгөдөг арга гэж харах болсон.

Нийгмийн маркетинг гэдэг хэрэглэгч нарт ашигтай, тэднийг соён гэгээрүүлдэг бөгөөд нөгөө талаас компанид ашигтай байдаг болсон байна.

MMCG судалгааны компанийн гүйцэтгэх захирал Д.Бум-Эрдэнэ:

Хүн өөрөө зүрх сэтгэлээ дагадаг амьтан учраас одоо зүрх сэтгэлд нь хүрсэн зүйлд татагдахаас биш, тасралтгүй сурталчилж байгаа зүйлд татагдахаа больсон.

Түүнчлэн орчин үеийн залуус тогтвортой компаниудын бүтээгдэхүүн, үйлчилгээг авах хандлага 50-55 хувь болжээ. Тогтвортой компани гэдгийг нийгмийн сайн сайхан, байгаль орчны асуудалд анхаарлаа хандуулдаг, үүнд мөнгө зарцуулдаг компани гэж тодорхойлж байна.

Харилцаа хүртэл өөрчлөгдөж, тогтолцооны хувьд БОСОО БИШ ХЭВТЭЭ чиглэлд шилжжээ. Энэ нь хэрэглэгчид компани, улс төрчдөд бус зөвхөн өөртэйгөө ижил хэрэглэгч нарт итгэдэг болсон гэсэн үг бөгөөд зөвхөн хэн нэгэн найз нөхөд нь санал болгож байгаа зүйлийг худалдан авдаг болсон аж.

Улаанбаатар хотод интернетийн хэрэглээний нэвтрэлт 80, нийт төвлөрсөн газрынх 70%-тай байгаагаас хэрэглэгчид сошиал ертөнцөд л ихэнх цагаа өнгөрүүлж байгаа нь батлагдана.

Хүмүүс хэрвээ таны сурталчилгааны талаар ярилцахгүй байвал хүнд хүрээгүй байна гэсэн үг.