Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх УИХ-ын Хянан шалгах түр хорооны нотлох баримтыг шинжлэн судлах сонсгол үргэлжилж байна.

УИХ-ын гишүүн Ө.Шижир асуулт асуулаа. Тэрээр Оюутолгойн зээл хувь нийлүүлэгчдийн 11 хувийн хүүтэй зээл. Бүх татвараа нийлүүлээд Монгол улс өнөөдрийн ханшаар 1,8 тэрбум долларын ашиг хүртсэн. Зөрүүлээд Риогийн охин компани 1,1 тэрбум долларын менежментийн зардал гэж авсан. Үндсэндээ Монголд төлж байгаа бүх татвар хураамжтай адил хэмжээний менежментийн төлбөр авч байна гэсэн үг.

Оюутолгой компанийн зээлийн хугацаа 2028 оны зургаадугаар сарын 30-нд дуусна. Хэрвээ зээлийн төлбөрөө төлж чадахгүй бол Оюутолгой компани зээлийн барьцаанд хураагдах эрсдэл байгаа юу? Хаанахын хэчнээн банканд хэдэн удаагийн барьцааны гэрээ байгаа вэ?

"Оюутолгой" компанийн Гүйцэтгэх захирал С.Мөнхсүх "Оюутолгой компани 15 банканаас 4,4 тэрбум долларын зээл авсан. 2016 онд авсан зээл нь Оюутолгойтой холбоотой барьцааны багц. Бусад зээл нь барьцаагүй. Барьцаалагдсан гол санхүүжилт нь төслийн санхүүжилт буюу 4,4 тэрбум долларын 15 банкатай хийсэн хамгийн түрүүнд төлөгдөх ёстой зээл. Үүнд Рио Тинто компаниас баталгаа гаргасан. Үйлдвэрлэлийн үйл ажиллагаа доголдоод Оюутолгой ХХК зээлийн өр төлбөрөө төлж чадахгүй бол Рио Тинто төлнө гэх гэрээ. Рио Тинто мөнгө төлж чадахгүй бол миний ойлгосноор баялгийн эзэн Монгол улс хэвээрээ байна. Рио Тинто хөрөнгө оруулалтын болон бусад гэрээгээр олгогдсон эрхээ банкуудад шилжүүлнэ гэх утгатай гэв.