Ерөнхийлөгч У.Хүрэлсүх Гэгээн Ширээт Улсын төрийн тэргүүн, Пап XIV Леогийн урилгаар тус улсад хийж буй төрийн айлчлалын хүрээнд Чингис хаан Үндэсний музей болон Ватиканы Апостолын номын сан хооронд “Хамтран ажиллах тухай санамж бичиг”-ийг өчигдөр байгууллаа. 

Хоёр тал хамтран ажилласнаар тус улсын номын санд хадгалж буй Монголын түүхтэй холбоотой судалгааны материал, сурвалж бичиг, ховор архивын баримттай танилцах, судлах боломж бий болно. Мөн харилцан эрдэмтэн судлаачдыг солилцсоноор судалгааны чанарт ахиц гарах юм. 

Ватиканы Апостолын номын сан нь дэлхийн хамгийн эртний, үнэт өв бүхий номын сангуудын нэг. Олон мянган жилийн түүхтэй гар бичмэлүүд, эртний ном судрууд, архивын материал, хэвлэмэл ном, газрын зураг, болон зоос, медалиуд хадгалагддаг байна. 

Тус номын сан 1.6 сая гаруй ном, 80 мянга орчим гар бичмэл бүхий өвтэй, эдгээр нь дэлхийн шашин, шинжлэх ухаан, урлаг, соёл, түүхийн үнэт эх сурвалж болдог байна.