Монгол Улсын Ерөнхий сайд Г.Занданшатар Канад Улсаас Монгол Улсад суугаа Элчин сайд Сандра Шүфани-г албан үүргээ дуусгаад эх орондоо буцаж байгаатай холбогдуулан 7-р сарын 25-ны өдөр хүлээн авч уулзав. 

Хоёр улсын харилцаа, хамтын ажиллагааг Иж бүрэн түншлэлийн түвшинд хүргэх, өргөжүүлэн бэхжүүлэхэд оруулсан хувь нэмрийг нь үнэлж Монгол Улсын Ерөнхийлөгч У.Хүрэлсүхийн зарлигаар Канад Улсаас Монгол Улсад суугаа Элчин сайд Сандра Шүфани-г “Найрамдал” медалиар шагнасныг гардууллаа.

Элчин сайд Шүфани Монгол, Канадын хамтын ажиллагааг уул уурхай, эрчим хүчний салбарт эрчимжүүлэх боломж буйг цохон тэмдэглээд, Монгол Улсын Засгийн газар, Гадаад харилцааны яам болон бусад түнш байгууллагуудаас үзүүлсэн дэмжлэгт гүн талархал илэрхийлэв.