Дулааны 3-р цахилгаан станцын нийт тоноглолын 70 хувь нь ашиглалтын хугацаа дууссан бөгөөд цаашид засвар хийж, насжилтыг уртасгах боломжгүй гэдгийг ДЦС-3-т Засгийн газраас томилсон бүрэн эрхт төлөөлөгч Н.Тавинбэх хэллээ. 

Тэрээр, дулаан цахилгааны эх үүсгэврийн тоноглолын хугацаа 25 жил байдаг ба урсгал засварыг цаг тухайд хийж чадвал ашиглалтын хугацааг тодорхой хэмжээнд уртасгах боломжтой. Гэвч 20-30 жил ашиглах ёстой тоног төхөөрөмжийг 50-60 жил ашиглаж байна. Тиймээс станцын нийт тоноглолын хамгийн багадаа 60 орчим хувийг бүрэн шинэчлэх шаардлагатай байгааг онцлов.

Төлөвлөгөөт ажил хугацаандаа дуусвал энэ өвлийг эрчим хүч, дулааны тасалдалгүй давах боломжтой

Одоогийн сэргээн босголтын ажилд 50 мегаваттын нэг, 25 мегаваттын нэг турбин генераторыг шинэчлэхээр улсын төсөвт 2025 оны тодотголд тусгасан. Хоёр төхөөрөмж нийлээд 75 мегаваттын хүчин чадалтай. Эдгээрийг шинэчилснээр станцын суурилагдсан хүчин чадлын 40 хувийг шинэчлэх юм байна. Ингэснээр ашиглалтын хугацаа 30-40 жилээр сунгана. 

Энэ ажилд Засгийн газраас анхаарч, санхүүгийн асуудлыг шийдсэн бөгөөд худалдан авах ажиллагаа, ажил гүйцэтгүүлэх сонгон шалгаруулт хийж байна. 

Олон улсын туршлагаар энэ төрлийн ажлыг 12–16 сарын хугацаа шаарддаг тул 2026 оны 11-р сарын 1-нээс өмнө багтаан дуусгах төлөвлөгөөтэй ажиллаж байна гэв.

Харин 2025-2026 оны өвлийн их ачааллаас өмнө дулааны эрчим хүчээр хангахад шаардлагатай төлөвлөсөн ажлууд хэвийн үргэлжилж байна. Төлөвлөгөөт ажил хугацаандаа дуусвал энэ өвлийг эрчим хүч, дулааны тасалдалгүй давах боломжтой гэдгийг Засгийн газраас томилсон бүрэн эрхт төлөөлөгч Н.Тавинбэх хэлсэн юм. 

Э.Болор-Од