УИХ-ын хэсэг гишүүд нь УИХ-ын дарга Д.Амарбаясгаланг хуулийн дагуу шалгуулахыг шаардаж мэдээлэл хийж байхад нөгөө хэсэг нь  Г.Занданшатарын тэргүүлсэн Засгийн газрыг огцруулах бичигт гарын үсэг цуглуулж буй.

Тус саналд нэгдэж гарын үсгээ зурсан УИХ-ын гишүүн Э.Болормаа: 
"Миний хувьд П.Сайнзориг гишүүний санаачилсан Ерөнхий сайд Г.Занданшатарын тэргүүлсэн Засгийн газрыг огцруулах бичигт гарын үсэг зурсан. Ийм чухал зүйлд хөнгөн хандаж болохгүй учир би сайн бодож байж гарын үсгээ зурлаа. Энэ засгийн газар үргэлжилбэл Монгол Улсад хортой юм болов уу гэж бодож байна. Засгийн газрыг огцруулах бичигт 50 гаруй гишүүн гарын үсэг зурсан гэж сонссон. 

Огцруулах үндэслэл хэд хэд бий. АМНАТ-тай холбоотой маш ноцтой асуудал. Үүний эсрэг олон нийт л тэмцэж байна. Үүнийг эргэж харах ёстой. Би Оюу Толгой  ХК-ийн хянан шалгах түр хорооны гишүүн. Бид өдөр тутам 10 тэрбум төгрөгийн хүү цуглуулж байна. Энэ эс үйлдэхүй арай хэтэрч байгааг ч хэлсэн. 

Ордны гадаа багш, эмч, ахмадууд жагсаж байна. Тэдгээр төлөөллүүдтэй уулзах ёстой. Нөгөө талаараа МАН-ын бүлгийн дэд даргын хувьд хоёр хүн өрсөлдөөд нэг нь ялагдана гэдэг нь ажлын тайланд нь дүнгээ тавьж буй бодит зүйл" гэв.