Гадаадын иргэн харьяатын газар, Үндэсний статистикийн хорооноос гаргасан тайланд Монголд хөдөлмөр эрхэлж байгаа гадаад иргэд болон тэр дундаа БНХАУ-ын иргэдийн виз олголт өссөн талаар бид мэдээлсэн. 

2021 онд 3500 гаруй хятад иргэн манай улсад хөдөлмөрийн гэрээгээр ажилласан бол 2025 оны гуравдугаар улирлын байдлаар 16 мянга гаруй буюу 5 дахин өсжээ. 

Зам тээврийн салбарт хэчнээн гадаад ажилтан ажиллаж байгааг Б.Дэлгэрсайхан сайдаас тодруулахад "Гадаад ажилчдын тоо нэмэгдэж байгаа нь хэд хэдэн шалтгаантай. Нэгдүгээрт, бид өөрсдөө гадагшаа явж ажиллаж байна. Хоёрдугаарт, манай улс ажиллах хүчний дутагдалд орсон.      

Гуравдугаарт, бүтээн байгуулалт нэмэгдэх хэрээр гадаад ажилчны тоо нэмэгддэг. Энэ нь богино хугацаатай үзэгдэл юм. Ялангуяа хил холболтын төмөр зам барих, томоохон бүтээн байгуулалтад гадаад ажилтан авах зайлшгүй шаардлагатай. Ганц хятадаас биш олон улсаас ажилтан авдаг болсон. 

Индонезээс тоног төхөөрөмжийн, уул уурхайн инженерүүд ирж байна. Дундад Ази, Филиппинээс ирцгээдэг. Аялал жуулчлалаа хөгжүүлье гэвэл ид улирлын үеэр гаднаас ажилтан авах хэрэгтэй. Учир нь зун ажиллах хүчний дутагдалд ордог юм билээ. Гадаад ажилтнууд бүх салбарт ажиллаж байгаа тул тоо нь өссөн.

Гашуунсухайт-Ганцмодны  хил холболтын төмөр зам дээр л гэхэд 1000 хятад ажилтан бий. Гэхдээ тэд наашаа орж ирдэггүй. Өглөө Монголын нутаг руу орж ирээд орой нь буцдаг. Хилийн, хаалттай бүс дотроо л ажилладаг" гэв.