Дэлхийн банкны зөвлөх Себастьян Фү, Цахим хөгжил, инновац, харилцаа холбооны яамны төлөөллүүдтэй "Ухаалаг засаг-2" төслийн хүрээнд уулзжээ.

Дэлхийн банкны санхүүжилтээр хэрэгжүүлж буй “Ухаалаг Засаг-2” төслийн хэрэгжилтэд дэмжлэг үзүүлэх чиглэлээр Дэлхийн банкны төлөөлөгчид 2025 оны хоёрдугаар сарын 17-21-ний өдрүүдэд Монгол Улсад ажиллаж байна. Тус төслийн “Зөвшөөрлийн цахим системийг хөгжүүлэх бүрэлдэхүүн хэсэг” нь Эдийн засаг, хөгжлийн яаманд хэрэгжиж байгаа билээ.

2025 оны хоёрдугаар сарын 18-ны өдөр Дэлхийн банкны зөвлөх Себастьян Фү, Цахим хөгжил, инновац, харилцаа холбооны яам болон төсөл хэрэгжүүлэх нэгжийн холбогдох ажилтнуудын хамт Эдийн засаг, хөгжлийн яамны Төрийн захиргааны удирдлагын газрын даргын албан үүргийг түр орлон гүйцэтгэгч, “Ухаалаг Засаг-2” төслийн удирдах хорооны гишүүн Т.Баясгалан болон холбогдох албаны хүмүүстэй уулзалт хийв.

Уулзалтын үеэр төслийн үр шим хүртэгч Эдийн засаг, хөгжлийн яамны зүгээс “Ухаалаг Засаг-2” төслөөс үзүүлж буй дэмжлэгт талархлаа илэрхийлж, холбогдох чиглэлээр хэрэгжүүлж байгаа ажил, хүрч буй үр дүнгийн талаар мэдээлэл өгсний зэрэгцээ цаашид хийхээр төлөвлөсөн ажлын талаар ажил хэрэгч хэлэлцүүлэг өрнүүлэв.

Талууд зөвшөөрлийн үйл ажиллагааг бизнес эрхлэгчдэд шуурхай, хялбараар хүргэн бизнесийн орчныг сайжруулахад төслийн ач холбогдлыг онцлон 2025 онд шинээр хийх ажлын талаар тохиролцлоо.

Эх сурвалж: Эдийн засаг, xөгжлийн яам