Монгол-Чехийн бизнес форум Прага хотноо болжээ. Бизнес форумыг нээж Монгол, БНЧУ-ын Ерөнхийлөгч нар үг хэллээ.

БНЧУ-ын Ерөнхийлөгч Петр Павел “Манай хоёр улсын найрамдалт харилцааны бэлгэ тэмдэг бол Эрдэнэт үйлдвэр юм. Манай улсын мэргэжилтнүүд Эрдэнэт үйлдвэрийн ордыг нээн илрүүлэхэд голлох үүрэг гүйцэтгэн ажилласан. Ашигт малтмалын салбарт хамтран үр дүнтэй ажиллаж байсан шигээ бусад салбарт бизнесийн түншлэлийг бий болгож ажиллана гэдэгт итгэлтэй байна” гэсэн байна.

Ерөнхийлөгч У.Хүрэлсүх “Хоёр улсын бизнесийн форумд оролцож байгаадаа баяртай байна. Чех хүмүүс 1920-иод онд шар айргийн үйлдвэр ажиллуулж, Замын -Үүд өртөөнд хэдэн Чех ажиллаж байсан түүх бий. Бизнес эрхлэгчид шинэ түүхээр хоёр улсын худалдаа, эдийн засгийн хамтын ажиллагааг баяжуулан бэхжүүлж, хамтарсан төсөл хэрэгжүүлж ажиллахыг хүсье” гэв.

Форумд Монголоос хүнс, худалдаа үйлчилгээ, уул уурхай, эрүүл мэнд, хөдөө аж ахуйн салбарын 100 орчим бизнес эрхлэгч, Чехийн талаас мөн 100 гаруй компанийн төлөөлөл оролцжээ.