Монголын анхны олон улсын контемпорари ЛХАМ галерей 2024 оны 10-р сарын 17-ноос 10-р сарын 20-ны хооронд Парис хотноо зохион байгуулагдах Европ дахь Азийн урлагийн тэргүүлэгч наадам Asia NOW-ийн 10 жилийн ойн үзэсгэлэнд оролцох болсныг дуулгахад таатай байна. Уг наадмын түүхэнд бид анх удаа Монгол улсыг төлөөлөн оролцсон нь наадмын онцлох баримтуудын нэг болсон бөгөөд уран бүтээлч Б.Баатарзоригийн бүтээлүүдийг толилуулах юм. 

Уран бүтээлч Баатарзоригийн Батжаргал нь монгол зургийн урга барилаар бүтээл туурвидаг бөгөөд, поп соёлын элементүүдийг оруулахаас гадна нийгмийн асуудал, улс төрийн үзэл суртал зэрэг олон сэдвийг тусган харуулдаг билээ. Олон улсын үзэгчдэд монголын контемпорари урлагийн хөгжлийг монгол зургийн бүтээлээр дамжуулан хүргэх нь сонирхолтой хийгээд шинэлэг хэмээн ЛХАМ галерей итгэж байна.

Батжаргалын Баатарзоригийн тухай

Батжаргалын Баатарзориг нь Монгол улсын Улаанбаатар хотод 1983 онд төрсөн. Тэрээр Улаанбаатар хотын Соёл урлагийн их сургуульд буддын шашны уламжлал болох Монгол зургаар суралцан 2005 онд төгссөн. Тэрээр Монголын урчуудын эвлэл (МУЭ), Монгол зураг нийгэмлэг, Global Artist Pension Trust-н гишүүн юм. Түүний бүтээлүүд Jack Bell Gallery (Лондон, 2022), Spirit of Gobi (2021), Seventh Mediations Biennal (Lodz, 2020), Бангкокийн урлагийн биенналь (Лондон, 2022), Инчуанийн хоёрдугаар биенналь (Инчуан, 2018) зэрэг дэлхийн хэмжээний урлагийн биенналь, музей, галерейд дэлгэгдэж, олон үзэсгэлэнд тавигдсан. Баатарзоригийн уран бүтээлийг дүрс, өнгөний нарийн, нууцлаг харилцан хамааралтайгаар нь таньж болохуйц. Түүний дүрсүүд нь ихэвчлэн өөрийгөө ухамсарлан шүүмжлэлтэй хандаж, орчин үеийн улс төр, нийгмийн асуудал, поп соёлын бэлгэ тэмдгүүдийг буддын шашны сүнслэг байдал, монгол бөөгийн соёлын хамт хослуулдаг. Үүний үр дүнд үзэгчдийг сониучирхах боломж олгож, ургуулан бодох чадвар төдийгүй ухамсрыг өдөөж өгдөг.

ЛХАМ галерейн тухай

Лхам галерей нь Монгол улсын анхны олон улсын контемпорари галерей бөгөөд дэлхийн жишигт нийцсэн ажлын арга барилаар үзэсгэлэнг толилуулахыг зорьж, мөн уг стандартыг уран бүтээлчдэд таниулж байгаа нь биднийг салбартаа анхдагч болгож байна.

Монгол болон төв Азийн бүтээлүүдийг олон улсын зах зээлд хүргэхээр ажиллахын сацуу уран бүтээлчдийг зөвхөн бүтээлдээ төвлөрөн ажиллах боломжийг олгож, галерейн зүгээс зохих менежментийг бүрэн гүйцэтгэж байгаа нь монголын урлагийн салбарт жишиг болгон цаашид тогтоохыг зорьж буй загвар юм. Урлагийн менежментийн мэргэжлийн хамт олон, олон улсын зөвлөхүүд болон нэр бүхий галерейн кураторуудтай хамтарч ажилласнаар бид судалгаа, туршлагийн хамтаар үйл ажиллагаагаа үргэлжлүүлж байна.