#PUBGMobile дэлхийн аварга шалгаруулах тэмцээнд оролцох Монголын дөрвөн багийн хоёр нь маргааш тэмцээнээ эхлүүлнэ.

PUBG Mobile-ын дэлхийн аварга шалгаруулах тэмцээн буюу 3 сая ам.долларын шагналын сантай "PUBG Mobile Global Championship 2024" Малайзын Куала Лумпур хотод үргэлжилж байна.

Тэмцээний хоёр дахь долоо хоногт "Улаан" хэсгийн тоглолтууд эхлэх бөгөөд Монголын "Falcons Force", "IHC Esports" багууд энэ сарын 7-10-ны хооронд өрсөлдөнө. Тоглолтууд 19:00 цагаас эхэлнэ.

Улаан хэсэгт дэлхийн шилдэг 16 баг дөрвөн өдрийн турш өдөрт 6, нийт 24 map тоглож шилдэг 3 нь финалын шатанд шалгарна. Харин 4-11-р байр эзэлсэн найман баг "Survival Stage" шатанд шалгарах бол хамгийн бага оноотой 5 нь гэртээ харина.

• АРВАННЭГДҮГЭЭР САРЫН СПОРТ: Электрон спортын дэлхийн аваргууд болно
• Монголын "4Merical Vibes" баг хоёр дахь удаа Төв, Өмнөд Азийн аварга боллоо

Өмнөд Азийн оноогоор дэлхийн аваргад оролцох эрхээ авсан "Falcons Force" нь Саудын Арабын багийн нэр дээр тоглодог бөгөөд өнгөрсөн жил харамсалтайгаар дэд байр эзэлсэн. Тэд энэ жил багийн бүрэлдэхүүндээ "4Merical Vibes" багт тоглож байсан Мөнхболдын "EAST" Батмөнхийг нэгтгэж таван хүний бүрэлдэхүүнтэй оролцож байна.

Харин өнгөрсөн жилийн аварга "IHC Esports" сонгон шалгаруулалтаас эрхээ авч чадаагүй ч тусгай урилгаар Малайзад ирсэн. Аваргууд өмнөх бүрэлдэхүүнээс Хатанбаатарын "Alex" Хүсэлбаатарыг чөлөөлж сэлгээнээс "ROGUE" Б.Хүслэнг гараанд гаргаад байна.

Өнгөрсөн долоо хоногт эхэлсэн тэмцээний "Шар" хэсгийн тоглолтууд өндөрлөж Оросын "Team Spirit", Өмнөд Солонгосын "DRX", Бразилын "Alpha7 Esports" багууд финалд шалгарсан.

Харин Балбын "Horaa Esports", Саудын Арабын "Twisted Minds", Филиппиний "Team Harame Bro", Хятадын "Regans Gaming", Оросын "De Muerte" багууд нутаг буцсан.