Монгол Улсын Засгийн газар, АНУ-ын Төрийн департамент хооронд байгуулсан хүүхэд хамгааллийн түншлэлийг гэрээний "Хүн худалдаалахаас хүүхдийг хамгаалах" төслийг 2020 оноос хэрэгжүүлж байна.

Хүүхэд хамгааллын түншлэлийн гэрээний "Хүн худалдаалахаас хүүхдийг хамгаалах" төслийн явц, үр дүн, цаашид авч хэрэгжүүлэх үйл ажиллагааг жил бүр хоёр улсын Засгийн газрын түвшинд хэлэлцдэг уламжлалын дагуу дөрөв дэх удаагийн хэлэлцээг өнөөдөр /2024.11.07/ Гадаад харилцааны яаманд зохион байгуулж байна.

Төслийн хүрээнд өнгөрсөн хугацаанд хүүхдийг хүн худалдаалах гэмт хэрэгт өртөхөөс урьдчилан сэргийлэх, хамгаалах, хүүхэд хохирсон хүн худалдаалах гэмт хэргийг хянан шийдвэрлэх ажиллагааг төгөлдөржүүлэх, хохирогч хүүхдэд үзүүлэх үйлчилгээний чанар стандартыг нэмэгдүүлэх, хууль сахиулах, шүүх эрх мэдлийн болон нийгмийн хамгааллын салбарын албан хаагч, ажилтан, мэргэжилтэн, сэтгэл зүйчдийг хүүхэд төвтэй, хохирогчид ээлтэй хандлагад суралцуулах чиглэлээр үе шаттай үйл ажиллагааг авч хэрэгжүүлснээс гадна цагдаагий байгууллагын хэмжээнд хүүхдэд ээлтэй таван өрөө байгуулсан.

Тус төсөл нь Монгол Улсад хүн худалдаалах, тэр дундаа хүүхдийг бэлгийн мөлжлөг, албадан хөдөлмөрийн зорилгоор худалдаалахтай тэмцэх чиглэлээр төрийн болон төрийн бус байгууллагын чадавхыг бэхжүүлэх, улмаар энэ төрлийн гэмт хэргийг бууруулах зорилготой.

Өнөөдрийн уулзалт, хэлэлцээнд Хууль зүй, дотоод хэргийн яам, Гэр бүл хөдөлмөр, нийгмийн хамгааллын яам, Улсын Ерөнхий прокурорын газар, Гэмт хэргээс урьдчилан сэргийлэх ажлыг зохицуулах зөвлөл, АНУ-ын Элчин сайдын яам, АНУ-ын Төрийн департаментын Хүн худалдаалах гэмт хэрэгтэй тэмцэх алба, Хүн худалдаалахтай тэмцэх, урьдчилан сэргийлэх дэд зөвлөл, салбар дундын хамтаран багийн гишүүд, төсөл хэрэгжүүлэгч Дэлхийн зөн, Азийн сан олон улсын байгууллага болон албаны хүмүүс оролцож байна.