Алдарт аймшгийн кино болох "Кэндимен"-ий гол дүрд тоглосон нэрт жүжигчин Тони Тодд энэ сарын 6-ны Лхагва гарагт Калифорни мужийн Марина Дел Рей дэх гэртээ 69 насандаа таалал төгсжээ.

Тоддын төлөөлөгч PEOPLE сэтгүүлд түүний нас барсан тухай мэдээллийг баталсан боловч нас барсан шалтгаан нь тодорхойгүй байна.

Тэрээр нийт 100 гаруй кино, телевизийн шоунд тоглож, төрөл бүрийн жанрын кинонуудад дүр бүтээсэн жүжигчин байсан юм. Түүний аймшгийн төрлийн бүтээлүүдээс дурдвал, 1990 оны "Амьд үхэгсдийн шөнө" киноны шинэ хувилбар, "Хар хэрээ", мөн "Сүүлчийн зорилт" цуврал кинонд Уильям Блудвортын дүрийг бүтээсэн байдаг.

Тони Тодд бол аймшгийн төрлөөрөө алдартай, өвөрмөц гүн хоолой, хүчирхэг дүр төрхөөрөө танигдсан Америкийн жүжигчин юм. Тэрээр 1954 оны 12 сарын 4-нд Вашингтон хотод төрсөн бөгөөд 1992 онд "Кэндимен" кинонд гол дүр бүтээж, алдартай болсон. Энэ дүр нь түүнийг аймшгийн кино урлагт тод мөртэй жүжигчин болгосон юм.

Эх сурвалж: People