Арав хоногт нэг удаа хийдэг хээрийн цасны хэмжилтийн мэдээгээр 11 дүгээр сарын 20-ны байдлаар нийт нутгийн 63 хувьд цастай байна.

• Увсын Малчин, Түргэн, Хөвсгөлийн Алаг-Эрдэнэ, Булганы Рашаант, Баяннуур, Сэлэнгийн Ерөө, Дархан-Уулын Шарын голд 20 см-ээс дээш,
• Увсын Хяргас, Цагаанхайрхан, Завханы Баянхайрхан, Цэцэн-Уул, Хөвсгөлийн Эрдэнэбулган, Цагаан-Үүр, Ренчинлхүмбэ, Булганы Тэшиг, Хангал, Сайхан, Хутаг-Өндөр, Өвөрхангайн Баянгол, Сант, Сэлэнгийн Орхон, Орхонтуул, Түшиг, Зүүнбүрэн, Баянгол, Хушаат, Дархан-Уулын Орхон, Төвийн Жаргалант, Заамар, Цээл, Борнуур, Угтаалцайдам, Лүн, Өндөрширээт, Баянчандмань, Хэнтийн Мөрөн, Дорнодын Цагаан-Овоод 11-20 см,
• Бусад нутгаар 10 см-ээс бага цастай.

Өмнөх арав хоногтой харьцуулахад цасан бүрхцийн хэмжээ 5 хувиар багассан ч цасны зузаан төв болон баруун аймгийн нутгийн хойд хэсгээр 5 - 9 см-ээр нэмэгджээ.

Цаг агаарын нөхцөлийн онцлог

Өнгөрсөн арав хоногт агаарын температур зүүн аймгийн нутгаар олон жилийн дунджаас 1.1...4.7 градусаар дулаан, төв болон баруун аймгийн нутгийн ихэнх хэсгээр -5.0...-1.1 градус, Баян-Өлгий, Баянхонгорын ганц нэг сумдын нутгаар -8.4...-5.1 градусаар хүйтэн бусад нутгаар дунджийн орчим, хур тунадас нийт нутгийн 95 гаруй хувьд дунджийн орчим ба бага, Хөвсгөл, Булганы ганц нэг сумдын нутгаар ахиу орсон байна.

Салхины хурд тал хээр болон говийн нутгаар түр зуур 16-27 м/с буюу аюултай үзэгдлийн, Булганы Могод, Говь-Алтайн Бугатад 29-30 м/с буюу онц аюултай үзэгдлийн хэмжээнд хүрч салхилсан байна.

Мал аж ахуйн үйлдвэрлэлд мал хээлтүүлэх, оторлуулах, малд нэмэгдэл тэжээл өгөх зэрэг ажлууд хийгдэж байна.