Төр, нийгмийн нэрт зүтгэлтэн С.Зориг агснны хөшөөг нүүлгэн шилжүүлсэн асуудлаар нийслэлийн Засаг дарга Б.Пүрэвдагва өнөөдөр 13.30 цагт мэдээлэл хийнэ. 
 

Хотын дарга Б.Пүрэвдагва, Хотын төвийн энэ газарт өндөр барилга барих гэж бүх ард түмний хандиваар боссон Монголын ардчиллын удирдагчдын нэг, төр нийгмийн нэрт зүтгэлтэн Санжаасүрэнгийн Зоригийн хөшөөг 2026 оны 7-р сарын 31-ний шөнө 03.00 цагт ямар нэг зөвшөөрөлгүйгээр хууль зөрчиж, хулгайн сэдлээр нүүлгэсэн ноцтой хэрэг гарлаа. НЗДТГ-аас ямар ч зөвшөөрөл өгөөгүй.

Нийслэл Улаанбаатар хот өмчөө хамгаална. С.Зоригийн хөшөө бол Монголын ардчиллын бэлгэ тэмдэг, Монголын шинэ үеийн түүхийн ой санамж, үзэл санаа, үнэт зүйл юм.

Тийм учраас Монголын түүхийг худалдах эрх хэнд ч байхгүй. Монголын ардчиллыг өмчлөх, наймаалцах эрх хэнд байхгүй. Монголын ардчилал Зоригтойгоо хамт байх ёстой.

1990 оны цагаан морин жилд төрсөн хүний хувьд эрх чөлөөний мэдрэмжтэй шинэ үеийн залуучууд үнэт зүйл, үзэл санаагаа хамгаалахын төлөө хатуу зогсох болно. Ардчилсан нийгэмд төрж, өссөн хотын даргын хувьд дараах шийдвэр гаргаж байна.

1-рт, Хулгайн сэдлээр шөнийн цагаар нүүлгэн шилжүүлсэн уран барималч Б.Дэнзэн гуайн бүтээл С.Зоригийн хөшөөг цагдаагийн хамгаалалтын дор, мэргэжлийн багтайгаар буцаан нийтийн эзэмшлийн талбайд нь буцааж байрлуулахыг Нийслэлийн Цагдаагийн газрын дарга, Генерал О.Ганбат, нийслэлийн Ерөнхий менежер Ч.Мэндбаяр нарт үүрэг болгож байна.

2-рт, Соёлын өвийг нүүлгэн шилжүүлэх, тээвэрлэх журам, Зөрчлийн хууль зөрчсөн этгээдүүдийг олж тогтоон, хариуцлага тооцож олон нийтэд мэдэгдэхийг үүрэг болгож байна.

3-рт, Намайг хотын даргаар байгаа цагт энэ газарт дахин ямар нэг барилга байгууламж барихгүй гэдгийг албан ёсоор мэдэгдэж байна.  

С.Зоригийн хөшөөг хулгайн сэдлээр нүүлгэн шилжүүлсэн асуудлыг надаас биш, АН-ынхаа ах нараас асуугаарай гэж АН-ын залуучуудад хэлмээр байна гэв.