Монгол Улсад албан ёсоор айлчилж буй Шинэ Зеланд Улсын Парламентын Төлөөлөгчдийн танхимын дарга Жерард Браунли Монгол Улсын Их Хурлын гишүүн, Ардчилсан Намын дарга О.Цогтгэрэл болон УИХ дахь АН-ын бүлгийн гишүүдийг хүлээн авч уулзлаа.

Уулзалтын үеэр УИХ дахь Ардчилсан Намын бүлгийн дарга, Ардчилсан Намын дарга О.Цогтгэрэл парламентын үйл ажиллагааг мэтгэлцээний зарчимд тулгуурлан явуулах, хяналтын чиг үүргийг шинэ шатанд гаргахад Шинэ Зеландын парламентын туршлагаас суралцах боломж их байгааг дурдав.

Тэрбээр өнгөрсөн 2025 оны хаврын ээлжит чуулганаар АН-ын бүлгийн гишүүд санаачлан Монгол Улсын Их Хурлын дэгийн тухай хуульд өөрчлөлт оруулж, УИХ-ын асуулгын цагийг бий болгосон бөгөөд сөрөг хүчнээс парламентын хяналт шалгалтыг удирдах боломжийг баталгаажуулсан зэрэг ахиц дэвшлүүдийг онцлов.

Эдгээр хуулиуд нь Монгол Улсад ардчилсан тогтолцоог бэхжүүлэх, парламентын үйл ажиллагаанд ил тод байдлыг нэмэгдүүлэхэд чухал ач холбогдолтойг талууд өндрөөр үнэллээ.

Жерард Браунли хоёр орны ардчиллын үнэт зүйлсийг эрхэмлэн, парламентын засаглал, сонгуулийн тогтолцооны төстэй талуудыг онцолж, цаашид парламентийн үйл ажиллагааг сайжруулах, ардчилсан засаглалыг бэхжүүлэх чиглэлээр хамтран ажиллах сонирхлоо илэрхийллээ.

Уулзалтад УИХ дахь Монгол-Шинэ Зеландын парламентын бүлгийн дарга С.Эрдэнэболд, гишүүд А.Ганбаатар, Г.Ганбаатар, Б.Жаргалан, Х.Тэмүүжин, Ардчилсан намын ЕНБД Н.Ганибал болон бүлгийн ажлын албаны төлөөлөл оролцлоо