Багш нар цалингаа 3.5 саяд хүргэхийг шаардаж, орон даяар ажил хаяхаа мэдэгдээд буй. Тус асуудлаар салбарын сайд П.Наранбаяр мэдээлэл хийлээ. 

Тэрээр "Ерөнхий сайд багш нарын цалингаа нэмүүлэхийг шаардаж, суулт зарлаж буй төлөөлөлтэй уулзсан. Ингэхдээ 3.5 сая төгрөгийн босгод багш нарын цалинг шууд хүргэх боломжгүй гэдгээ мөн илэрхийлсэн.

Багш нар үндсэн цалингаа 3.5 сая төгрөг болгох шаардлага тавьсан. Харин засгийн газрын зүгээс 2026 оноос 25 хувиар нэмэгдүүлэх боломжтой гэж мэдэгдсэн.

Салбар яам болон Засгийн газраас хуульд заасан хэм хэмжээний дагуу багш нарын цалинг нэмэх асуудалд анхааран ажиллаж байхад улс орон даяар ажил хаяхаар зарлаж буй нь буруу. Засгийн газартай багш нарын төлөөлөл тодорхой хэлцэл хийх, хөдөлмөрийн арбитрын зохицуулалт зэрэг олон журам, дүрмүүд зөрчигдөж байна.

Энэ төвшинд гурван жилийн дотор тодорхой үе шаттай хэрэгжүүлэх бодлогын хүрээнд зорилтот шатлалдаа хүрэх боломжтой. Он гарангуут ирэх жилийн төсөвт суулгасан төсөв болон бусад зохицуулалтаар 1.8 сая, хагас жилээс 2.5 сая төгрөгт хүргэхээр ажиллах юм.

Үйлдвэрчний эвлэлээс Засгийн газартай цалин нэмэх хэлцэл хийх явц, Хөдөлмөрийн арбитрт хандах зэрэг процессууд нь үндсэн зохицуулалтаараа яваагүй. Улс орон даяар ажил хаях юм бол боловсролын түүхэнд хар толбо үлдээнэ шүү.

Багш нарыг ийм хууль бус ажил хаялт руу турхирч байгаа Үйлдвэрчний Эвлэлийн холбоо ажиллаж буйд харамсаж байна. Хэрэв багш нар ажил хаялт зарлах юм бол Үйлдвэрчний Эвлэлийн холбоо хариуцлагаа хүлээгээрэй" гэв.