Агаарын бохирдлыг бууруулах Үндэсний хорооны дэргэдэх Эрдэмтдийн зөвлөл 2025-2026 оны өвлийн түлшний бодлогод  хагас коксон шахмал түлш хэрэглэх зөвлөмж өгөв.

Эрдэмтдийн зөвлөлийн Нарийн бичгийн дарга С.Төмөрбатаас тодруулахад, бид шийдвэр гаргах эрхгүй, зөвхөн шинжлэх ухаанд суурилсан зөвлөмж гаргах чиг үүрэгтэй.

2025 оны тавдугаар сард “Тавантолгой түлш” ХХК шинээр сайжруулсан шахмал түлш боловсруулах туршилт хийж, бүтээгдэхүүнд ашиглах барьцалдуулагчийн шинжилгээний дүнгийн  асуудлаар эрдэмтдийн зөвлөлөөр хэлэлцүүлэх хүсэлт тавьсан. 

Үүний дагуу Монгол болон гадаадын хэд хэдэн төрлийн барьцалдуулагчийн туршилтын дүнг харьцуулж үзэхэд, туршилтын шахмал түлшнээс ялгарч буй хорт хий (нүүрстөрөгчийн дутуу исэл) MNS 5216:2016 стандартад заасан хүлцэх хэмжээнээс давж байгааг тогтоосон.

Үүний улмаас Эрдэмтдийн зөвлөл шахмал түлшний  технологи нь одоогийн нөхцөлд аюулгүй байж чадахгүй гэж үзэн, нийслэлийн гэр хорооллын өрхүүдэд зориулан хагас коксон шахмал түлш хэрэглэх нь зүйтэй гэх зөвлөмж гаргасан.

Шинэ төрлийн түлш сонгохдоо нарийвчилсан судалгаа, шинжилгээнд үндэслэх шаардлагатайг ч анхааруулсан. 

Бидний зөвлөмжийг шийдвэр гаргагчид батална гэв.