ГССҮТ-д коронавирусийн халдварын сэжигтэй тохиолдол илэрч, тус эмнэлгийг өнөө орой /2021.01.05-ны 18.00 цаг/ тусгаарлалтад авсан гэж зарим сайт мэдээлэв. Энэ талаар ГССҮТ-ийн ерөнхий захирал Э.Галбадрахаас тодрууллаа.

-Гэмтлийн эмнэлэгт коронавирусийн халдварын сэжигтэй тохиолдол илэрсэн үү?
-Манай эмнэлэг коронавирусийн халдвараас сэргийлэх зорилгоор эмч, мэргэжилтэн, эмнэлгээр үйлчлүүлэгчдээс түргэвчилсэн шинжилгээг тогтмол авч байгаа. Өчигдөр манайд “Ачтан элит” эмнэлгээс нэг эмч ирж, хоёр өвчтөнийг үзсэн. Өнөөдөр “Ачтан элит“-д халдварын голомт үүссэнийг мэдээлсэн учир эмч, мэргэжилтэн, үйлчлүүлэгчдээсээ түргэвчилсэн шинжилгээ авлаа. Хариу бүгд сөрөг гарсан. Харин онош тодруулах зорилгоор тухайн эмчийн үзсэн хоёр өвчтөн, сахиур зэрэг 6-7 хүнд PCR шинжилгээ авч, 21.00 цагийн орчимд ХӨСҮТ-д хүргүүлсэн.

-“Ачтан элит” эмнэлгийн эмчийн шинжилгээний хариу ямар гарсан бол?
-Эмчийн PCR шинжилгээний хариу гараагүй байна. Тэр эмч мэргэжлийн хүн учир хамгаалалтын хувцас, бээлий, амны хаалттай ирсэн.

-2021 оны 1-р сарын 05-ны 22.00 цагийн байдлаар ГССҮТ-д нөхцөл байдал ямар байна вэ? Эмнэлгийг үнэхээр хамгаалалтад авсан уу?
-Эмнэлгийн үйл ажиллагаа хэвийн үргэлжилж байна. Хүлээн авах тасаг хэвийн ажиллаж байна. Хамгаалалтад авсан юм алга. Эмч, мэргэжилтнүүдээс шинжилгээ авах үед орох, гарах хөдөлгөөнийг түр хугацаагаар хязгаарласан. Халдварын шинэ мэдээлэл гарах бүрд манай эмнэлгийн бүсэд халдвар батлагдсан тохиолдолд тандалт хийж, асуумж судалгаа авч байгаа гэв.

ЭМЯ-ны 2021 оны 1-р сарын 06-ны 11.00 цагийн мэдээллээр ГССҮТ-д хийсэн PCR шинжилгээний хариу сөрөг гарсныг мэдээлэв. Харин тус эмнэлэгт очсон "Ачтан элит" эмнэлгийн эмчийн шинжилгээний хариу гараагүй байна гэлээ.