Цусны цочмог хорт хавдартай тэмцэж буй реппер, ая зохиогч, продюсер Lil Thug-E буюу Г.Төгөлдөрт зориулсан хандивын аяны талаар реппер Gee-тэй ярилцлаа.

-Хандивын аяны явц хэрхэн өрнөж байна вэ?
-Маш олон хүний итгэл, сэтгэлээр хандивын аян үргэлжилж байна. Гэр бүл, найз нөхөд, сонсогчид нь гар бие оролцож байгаа учир бид хамтдаа дүүгээ хөл дээр нь босгоно гэсэн бат итгэлтэй байгаа. Эмчилгээний зардалд хамгийн багадаа 650 сая төгрөг хэрэгтэй. Бүгд л эрвийх дэрвийхээрээ хичээж байна.

• Аравдугаар сарын 3-н буюу маргааш лайв концерт
• Аравдугаар сарын 10-нд 3x3 сагсан бөмбөгийн хандивын тэмцээн
• Аравдугаар сарын 16-нд нийтийн дуучдын нэгдсэн тоглолт
• Аравдугаар сарын 17-нд рок поп, хип хопын уран бүтээлчдийн нэгдсэн тоглолт
• Аравдугаар сарын 24-нд 5x5 сагсан бөмбөгийн хандивын тоглолтыг зохион байгуулахаар төлөвлөн ажиллаж байна.

Ресторан, кофе шоп, комеди клуб, албан байгууллагууд орлогоосоо хандивлаж байна. Бид хандивын тоглолт гээд хэзээ ч хуумгай хандахгүй. Үзэгчдэд чанартай тоглолт хүргэхээр хичээж байгаа. Хичээл зүтгэл талаар өнгөрөхгүй гэж итгэж байна.

-Маш богино хугацаанд хүмүүс нэгдэж, нэгнийхээ төлөө хичээж байгаа нь харагдаж байна.
-Тийм ээ. Манай дүү уулзсан хүн болгондоо өндөр сэтгэгдэл үлдээдэг, маш зөөлөн, хүн бүрд сайныг хүсдэг хүүхэд болохоор хүнд хэцүү энэ үед нь түүнийг гэсэн маш олон хүн хувь нэмрээ оруулж байна. Би энэ ярилцлагаар дамжуулж чин сэтгэлийн гараа сунгаж байгаа хүн бүрд халуун талархлаа илэрхийлье.

Бүрэн эдгэрэх боломжтой гэдэг нь хонгилын үзүүрт маш том гэрэл асаачихсан. Тэр гэрлийг хараад л бид чадах хүчээрээ зүтгээд байна.

Төөгөө дүүгээ цусны цочмог хорт хавдартай гэж оношлогдсоныг сонсох агшинд би байсан байрандаа гацчихсан. Шок гэдэг нь л тэр байх. Ямар ч хөдөлгөөн байхгүй, юу хийхээ мэдэхгүй, тэр дороо гацчихсан. Тэгээд хэсэг хугацааны дараа бодит байдалдаа эргэн орж юу болоод байгааг тунгаасан.  

Төөгий бол миний төрсөн дүүгээс өөрцгүй. Гэрээр маань орж, гардаг. Хамт компьютер тоглож, хоол унд иднэ. Хамтдаа нэг багт тоглодог. Ерөөсөө л бид бол нэг гэр бүлийнх. Бусад ах нар ч бас дүүгийнхээ төлөө надтай адил чадах бүхнээ хийх байх. Манай дүүд над шиг олон ах бий. Тэд бүгд дүүгээ хөл дээр нь босгохоор бүхнээ зориулж байгаа.

-Төөгийтэй сүүлд хэзээ холбогдсон бэ, биеийн байдал нь ямар байна вэ.
-Өнөөдөр холбогдсон. Химийн эмчилгээ нь эхэлчихсэн байгаа. “Миний дүү тэснэ шүү. Муухай өвчнийг давж гарахаа л бод. Өөр юунд ч бүү санаа зовоорой” гэж би хэлсэн. Олон зүйл ярьж чадаагүй. Ямартай ч эмчилгээгээ шат дараатай хийлгэж байгаа.

Хамгийн гол нь миний дүүгийн туссан өвчин бүрэн эдгэрэх боломжтой. Залуу хүн, элдэв хавсарсан өвчингүй, тогтмол хөдөлгөөн хийдэг байсан болохоор хөл дээрээ босох зуун хувь боломжтой. Бүрэн эдгэрэх боломжтой гэдэг нь хонгилын үзүүрт маш том гэрэл асаачихсан. Тэр гэрлийг хараад л бид чадах хүчээрээ зүтгээд байна.

Бидэнтэй хамтарч ажиллах байгууллага, хамт олонд үргэлж нээлттэй шүү. Өглөө сэрэхдээ л хандивын аяныг хэрхэн өргөжүүлэх вэ гээд бүгд шинэ санаагаа уралдуулж байна. Олон хүний сэтгэл шингэж байгаа болохоор дүү минь эдгэнээ. Мянга, зуун төгрөг хамаагүй хандивын аянд оролцоосой гэж хүсэж байна.

-Хандивын дуудлага худалдаа зохион байгуулж байгаа. Тэнд олны танилаас эхлээд хүссэн хүн бүр өөрт үнэ цэнтэй хувцас хэрэглэл, эд зүйлсээ сэтгэлийн хандив болгон өгч байсан. Тэр дунд Токиогийн олимпын мөнгөн медальт Сайед Моллай  өмсгөлөө хандивласан байна лээ.
-Төөгийгөөс тус гуйхад хэзээ ч үгүй гэдэггүй. Аливаад үргэлж сэтгэлээсээ ханддаг. Түүнийх нь хариу болгож хүмүүс олноороо хандивын аяныг дэмжиж байгаа байх. Сайед Моллай бидэнтэй холбогдож хандив өгмөөр байгаагаа хэлсэн. Ингээд өмсгөлөө хандивласан. “Хурдан эдгээрэй, Энэ бүгдийг чи давж гарч чадах хүчтэй гэдгийг чинь мэдэж байна” гэсэн урмын үгс хэлсэн бичлэгээ Төөгий рүү явуулсан. Хүнийг сэтгэлээр нь дэмжих чинь сайхан шүү дээ. Манай Моллай гоё залуу байна лээ.

-Та бүхний санасан бүхэн сэтгэлчлэн бүтэх болтугай. Хандивын аянд нь амжилт хүсье.
-Танай хамт олонд маш их баярлалаа.

Хандивын данс:

Хаан Банк ₮ : 5163496119 / Л. Ганчимэг /
Хаан Банк $ : 5163496696 / Ganchimeg Lhagva /