Засгийн газрын хуралдааны шийдвэрийг танилцуулж байна. 

Ерөнхий сайдын хэвлэлийн төлөөлөгч Ч.Болортуяа, Нийслэлийн төр, захиргааны байгууллагуудыг  2021 оны 12-р сарын 31-ний дотор нүүлгэн шилжүүлэх Засгийн газрын тогтоол гарлаа. Нүүлгэн шилжүүлэхтэй холботоой зардлыг шийдэхийг Сангийн сайд Б.Жавхланд үүрэг болголоо. 

Мөн БШУ-ы сайд Л.Энх-Амгаланд, ХААИС-ийн харьяа зарим сургуулийг Дархан-Уул аймаг руу, ШУТИС-ийн харьяа зарим сургуулийг Өмнөговь аймаг зэрэг орон нутаг руу шилжүүлэх замаар төвлөрлийг сааруулах шийдвэр гаргалаа. 



Ж.САНДАГСҮРЭН: ГОЛДУУ ИРГЭДЭД ҮЙЛЧИЛДЭГ САЛБАР, НЭГЖҮҮДИЙГ ЭХНИЙ ЭЭЛЖИНД НҮҮЛГЭНЭ



Хотын захиргааг нүүлгэх шийдвэрийг хэрхэн хэрэгжүүлэх асуудлаар Нийслэлийн Засаг даргын орлогч Ж.Сандагсүрэн сэтгүүлчдийн асуултад хариуллаа.
Засгийн газрын өнөөдрийн хуралдаанаар нийслэлийн төр, захиргааны байгууллагуудыг 2021 оны 12-р сарын 31-ны дотор Яармаг руу нүүлгэх шийдвэр гаргалаа. Энэ шийдвэрийг хэрхэн хэрэгжүүлэх асуудлаар Нийслэлийн Засаг даргын орлогч Ж.Сандагсүрэн сэтгүүлчдийн асуултад хариуллаа.

-Хотын захиргааны хэчнээн байгууллага эхний ээлжинд нүүх вэ?
-Нийслэлийн төр захиргааны 16 агентлаг бий. Эдгээр байгууллагад 900 гаруй ажилтан, албан хаагч ажилладаг. НЗДТГ-аас бэлтгэл ажлыг хангаж, 12-р сарын 31-ний дотор үе шаттайгаар нүүж, төвлөрлийг сааруулахад хувь нэмэр оруулж ажиллана.

-Яармагийн замын түгжрэл улам нэмэгдэх асуудлыг тооцсон уу?
-Яармагт төлөвлөлтийн алдаа гарсан нь үнэн. Замын түгжрэл, ачааллыг нэмэхгүйн тулд цагийн хуваарийн зохион байгуулалт хийх тухай хамгийн түрүүнд яригдаж байна.

-Нүүлгэн шилжүүлэх ажлыг хэрхэн зохион байгуулах вэ?
-Шинэ барилга гурван блок хэсэгтэй бөгөөд нэг блок нь ашиглалтад орсон. Бусад хоёр блокийн ажлын явц 70 хувьтай үргэлжилж байна. Нийслэлийн төр, захиргааны байгууллагуудаар өдөрт 3000-5000 иргэн үйлчлүүлдэг. Тиймээс эхний ээлжинд голдуу иргэдэд үйлчилдэг салбар, нэгжүүдийг нүүлгэхээр төлөвлөж байна. Нүүлгэн шилжүүлэлтийг үе шаттайгаар зохион байгуулж, ирэх намар гэхэд бүрэн нүүж дуусах юм.

-Нийслэлийн Засаг захиргааны байруудыг ямар зориулалтаар ашиглах вэ?
-Хангарьд ордон бол нийслэлийн өмч учир хэрхэх шийдвэрийг НИТХ-аас гаргана. Дуудлагаар худалдахаар төлөвлөсөн.

-Хангарьд ордныг ямар үнээр худалдахаар төлөвлөсөн бэ?
-Хоёр жилийн өмнө дуудлага худалдааны анхны үнэлгээг 46 тэрбум төгрөгөөр тогтсон. Энэ жил яаж тогтохыг тодорхой хэлж мэдэхгүй байна гэлээ.