Хөгжлийн банкны захирал асан Н.Мөнхбат, Б.Батбаяр нарыг шүүх хурал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр 11.00 цагийн орчимд эхэллээ.

Б.Батбаярыг 2016 онд  нээлттэй сонгон шалгаруулалтын дүнд үндэслэн Засгийн газрын хуралдааны шийдвэрээр Хөгжлийн банкны гүйцэтгэх захирлаар томилсон юм. Тэрээр энэ албан тушаалыг хоёр жил хашаад, 2019 онд ажлаа хүлээлгэн өгчээ.        

Түүнийг 2018 оноос эхлэн зээл олгохдоо албан тушаалаа урвуулан ашигласан байж болзошгүй  хэмээн шалгаж эхэлжээ.

Түүний өмгөөлөгч н.Одонтунгалаг шүүх хурал эхлэхээс өмнө байр сууриа илэрхийлэв.   

“Миний үйлчлүүлэгч Б.Батбаярыг одоо ямар үндэслэлээр шалгаж байгаа нь тодорхойгүй ч Эрүүгийн хэрэг үүсгэн, яллагдагчаар татжээ. Гэм буруутай, эсэхийг шүүх шийднэ. Өнгөрсөн  гурван жилийн хугацаанд Б.Батбаяр дуудсан цагт ирж, мэдүүлэг өгсөн. Түүнийг цагдан хорих саналыг АТГ-аас прокурорт хүргүүлснийг өчигдөр (2022.01.27) 21.30 цагт буюу ажлын цаг дууссаны дараа түүнд мэдэгджээ.         

Өнгөрсөн гурван жилийн турш түүнийг зээл олгохдоо албан тушаалаа урвуулан ашигласан эсэхийг шалгахад гэм буруутай нь батлагдсан бол хэрэг шүүх рүү шилжих хангалттай хугацаа өнгөрсөн. Хуулийн байгууллага хараат бус байх үүргээ хэрэгжүүлж байна уу гэдэгт эргэлзэж байна. Б.Батбаяр хоёр жил Хөгжлийн банкийг удирдахдаа зээл олгох шийдвэрийг ганцаараа гаргаагүй, ТУЗ шийдсээр ирсэн. ААН-үүд зээлээ эргэн төлөхгүй байгаа нь Б.Батбаяр захиралтай шууд холбоогүй. Ямар ч хүнд тайлбар хэлэх боломж олгох ёстой байтал өнөөдөр шууд хорих гэж байгаад гайхаж байна. Хэрэгт холбогдсон хүн бүрийг хорьдоггүй. Гэрчийг дарамталсан уу, оргон зайлсан уу гэх мэт хорих хууль зүйн бодит үндэслэл байх ёстой. Тухайн байгууллагыг удирдсаны төлөө, Хөгжлийн банк нийгмийн анхаарлын төвд орсны төлөө АТГ хорьж болохгүй. Би шүүх байгууллагыг хэлээгүй байна. Энэ хүнийг хорьсноор юуг шийдэх вэ?” гэсэн юм.

2016 оны наймдугаар сард Засгийн газрын  хуралдааны шийдвэрээр  Хөгжлийн банкны ТУЗ-ийн дарга Б.Шинэбаатарыг үүрэгт ажлаас нь чөлөөлж, ЗГХЭГ-ын дэд даргаар ажиллаж байсан Б.Даажамбыг томилжээ.             

Мөн гүйцэтгэх захирал Н.Мөнхбатыг чөлөөлж, Б.Батбаярыг 2016 оны арван хоёрдугаар сард томилсон юм.

Б.Батбаярыг дахин гэмт хэрэг үйлдэж болзошгүй, гэрчид нөлөөлж, гэрчээр зориуд худал мэдүүлэг өгүүлж болзошгүй хэмээн үзэж, нэг сар хорих шийдвэрийг шүүхээс гаргав. Түүнийг  чухам аль гэрчид нөлөөлж болзошгүй гэж үзсэн бэ гэсэн өмгөөлөгчийн асуултад хүсэлт гаргагч хариулаагүй байна. Мөн шүүхээс Н.Мөнхбатыг нэг сарын хугацаатай цагдан хорих шүүхийн шийдвэр гаргалаа.

Б.Батбаярын өмгөөлөгч н.Одонтунгалаг "Миний өмгөөлөгчийг цагдан хорих баримт хэмээн 15 хавтас материал авчирчээ. Шүүх 5 минут завсарлан,  материалтай танилцаад шийдвэрээ гаргалаа. 5 минутад тэдгээрийг сөхөх ч боломж гарахгүй. Шүүх энэ хэргийг шударга ёсны үндсэн дээр, мэтгэлцээний хүрээнд хэргийг  шийднэ гэж бодсон. Гэвч хэргийг сөхөж үзсэнгүй. Дан ганц "шалдан" саналд тулгуурлалаа. Шүүх хүний эрх ашгийг хамгаалж байна уу?  Шүүн таслах ажиллагаа тодорхой улс төрчийн хараан дор болов уу гэсэн хардлага төрж байна. Миний үйлчлүүлэгч ямар ч гэрчид нөлөөлсөн гэх баримт байхгүй. Төрийн байгууллага хүн гүтгэж болохгүй. Нотлох баримтад үндэслэн хорих ёстой. Шүүх баримт бий биз дээ, прокуророо та уншсан биз дээ" гээд л шийдвэрээ гаргачихлаа. Талууд мэтгэлцэхгүй бол шүүх хурал хийх хэрэг байна уу. Миний тайлбарыг шүүх хүлээн авсангүй. Шударга үнэнийг тогтооно гэж шүүгчид тангараг өргөдөг. Үнэхээр гомдолтой байна" гэв.
 

Б.Баатарсайхан: Гурван жилийн хугацаанд үнэн мөнийг тогтоох бүрэн үндэслэл байсан

Хөгжлийн банкны Дэд захирал асан, Төсөл зээлийн газрын захирал Ч.Мөнхбаярын өмгөөлөгч Б.Баатарсайхан:
 Ч.Мөнхбаярыг 30 хоног цагдан хорих шийдвэрийг шүүх гаргалаа. Хөдөлшгүй нотлох баримт байхгүй гэж өмгөөлөгчдийн зүгээс үзэж байна. Тийм нотлох баримтыг шүүхэд ирүүлээгүй. Тиймээс бид хуулийн дагуу шүүхийн шийдвэрийг давж заалдах гомдол гаргана. Энэ хэрэг гурав дахь жил рүүгээ орж байна.

Зээл олгохдоо албан  тушаалаа урвуулан ашигласан, бусдад давуу байдал олгосон гэсэн үндэслэлээр шалгаж байгаа. Улс төрийн нөлөөлөл орсон хэмээн бид хардаж байгаа. Үйлчлүүлэгчийнхээ эрх, ашиг сонирхлыг хамгаалахын тулд өмгөөлөгчид хууль ёсны дагуу ажиллаж байна. Гурван жилийн хугацаанд үнэн мөнийг тогтоох бүрэн үндэслэл байсан ч яагаад ийнхүү удааж байгааг мэдэхгүй байна. Ч.Мөнхбаяр дуудсан цаг тухай бүрд нь ирж мэдүүлгээ өгч, хэрэг хянан шийдвэрлэх үйл ажиллагаанд саад болсон зүйл байхгүй.

Өчигдөр бидэнд мөн л ажлын бус цагаар шүүх хуралдааны товыг мэдэгдлээ. Шүүхээс мэдэгдээгүй үед үүнийг зөрчил гэж харж болохоор юм. Прокурорын санал өчигдөр /02.17/ 15:30 цагт ирсэн байна. Шүүх холбогдох үүрэгтэй ч мэдэгдээгүй. Прокурорын саналыг үндэслэлгүй гэж өмгөөлөгчийн хувьд үзэж байна. Гурван жил шалгагдаж байгаа асуудлыг өнөөдөр ийм байдлаар шийдвэрлэж байгаа нь учир дутагдалтай юм. Үйл ажиллагаа явуулах эрхийг нь хязгаарлах, хувийн батлан даалтад гаргах гэх мэт 4-5 төрлийн таслан сэргийлэх арга хэмжээ байдаг. Өмнө нь манай үйлчлүүлэгчид батлан даалтад гаргах таслан сэргийлэх үйл ажиллагаа авч байсан, зөрчөөгүй. Өнөөдөр нийгмийн сэтгэлзүйд хөтлөгдөж ийм арга хэмжээ авч байгааг өмгөөлөгчид хүлээн зөвшөөрөхгүй, хуулийнхаа дагуу гомдлоо гаргана.

Өнөөдөр Капитал группийн захирал, УИХ-ын гишүүн асан Б.Ундармаагийн нөхөр н.Ариунболд, "Алтай констракшн" компанийн захирал Х.Бат-Эрдэнэ нарыг мөн шүүнэ.

"Бишрэлт  групп"-ийн охин компани болох "Монгол Эм Импекс Концерн" Хөгжлийн банкнаас 4.6 тэрбум төгрөгийн зээл авсан. Мөн Капитал банк Хөгжлийн банкны дамжуулан зээлдэгчээр ажиллажээ. Капитал банкны төлөх ёстой нийт зээл 54.4 тэрбум төгрөгт хүрчээ.

Х.Бат-Эрдэнэ захирлын тухайд түүний эзэмшдэг "Монгол драй милк" компани хуурай сүүний үйлдвэр байгуулахаар зээл авсан ч чанаргүй зээл болж, 49.4 тэрбум төгрөгийн үлдэгдэлтэй байна.