Үндэсний Статистикийн хорооноос/ҮСХ/ 2025 оны эхний хагас жилийн гэмт хэргийн статистик тайланг гаргав. Тайланд дурдсанаар бүртгэгдсэн гэмт хэрэг 2025 оны эхний хагас жилд 26.7 мянга болж, өмнөх оны мөн үеэс 30 хувиар өсжээ.

Мөн гэмт хэрэгт холбогдсон яллагдагчдын тоо 11,798 болж  13 хувиар өсөв. Нийт яллагдагчдын 689 нь  18 хүртэлх насны хүүхэд, 1,325  нь эмэгтэйчүүд байна.

Зөвхөн оны эхний хагас жилд 24,600 хүн гэмт хэргийн хохирогчоор бүртгэгдсэнээс 1,409 нь хүүхэд, 11,341 нь эмэгтэйчүүд.  

Энэ хугацаанд 5,680 хүн гэмтэж, 567 хүн амь насаа алдсан нь өмнөх оны мөн үетэй харьцуулахад 20 орчим хувиар өссөн үзүүлэлт юм.

Авлигатай тэмцэх газрын Мөрдөн шалгах хэлтэст 2025 оны эхний хагас жилд нийт 319 авлигын хэрэг бүртгэгдсэн нь өмнөх оны мөн үеэс 15 хувиар буурсан үзүүлэлттэй байна. Нийт бүртгэгдсэн 335 гэмт хэргийн 319 нь авлигын шинжтэй бөгөөд Монгол Улсын Эрүүгийн хуулийн 22 дугаар бүлгийн зүйл ангиар ангилахад:

• Эрх мэдэл, албан тушаалаа урвуулан ашигласан: 254 хэрэг (75.8%)
• Хахууль авсан: 33 хэрэг (9.9%)
• Хахууль өгсөн: 31 хэрэг (9.3%)
• Хуулийн этгээдийн эрх мэдлийг урвуулсан: 10 хэрэг (3.0%)
• Үндэслэлгүйгээр хөрөнгөжсөн: 5 хэрэг (1.5%)
• Төсвийн хөрөнгийг зориулалтын бусаар зарцуулсан: 1 хэрэг (0.3%) байна.

Гэмт хэргийн улмаас 398.2 тэрбум төгрөгийн хохирол учирснаас 127.8 тэрбумыг нөхөн төлүүлжээ.