Япон Улсаас Монгол Улсад суугаа Онц бөгөөд Бүрэн эрхт Элчин сайд М.Игавахара, Төв аймгийн Засаг дарга Л.Төмөрчөдөр нар Японы Засгийн газрын “Өвсний үндэс - Хүний аюулгүй байдлыг хангах буцалтгүй тусламж”-ийн хөтөлбөрийг хэрэгжүүлнэ.

Тэд “Төв аймгийн Дэлгэрхаан сумын эрүүл мэндийн төвийн засварын төсөл”-ийн гэрээнд гарын үсэг зурав.

Уг төслийн хүрээнд Төв аймгийн Дэлгэрхаан сумын эрүүл мэндийн төвийн байрны дотор засал, цахилгаан, дулааны шугам, агааржуулалтын системийг засварлах, модон хаалгануудыг солино.

Тус эрүүл мэндийн төвийн орчин нөхцөл сайжирч, сумын иргэд эрүүл аюулгүй орчинд эмчилгээ үйлчилгээ авах нөхцөл бүрдэх юм.

Японы Засгийн газар Монголд 1990 оноос өнөөдрийг хүртэл 35 жилийн турш “Өвсний үндэс - Хүний аюулгүй байдлыг хангах буцалтгүй тусламж” хөтөлбөрийг хэрэгжүүлж байна. Энэ удаагийн төсөл нь Өвсний үндэс буцалтгүй тусламжийн 614 дэх, Төв аймагт хэрэгжих 25 дахь төсөл болж байна. Мөн энэ удаа батлагдсан төслийн санхүүжилтийн дээд хязгаар нь 131,411 ам.доллар юм.

“Өвсний үндэс - Хүний аюулгүй байдлыг хангах буцалтгүй тусламж”-ийн хөтөлбөрийг Япон Улсын Засгийн газар 1990 оноос хэрэгжүүлж эхэлсэн бөгөөд хөгжиж буй орнуудын хот болон орон нутгийн засаг захиргаа, боловсрол, эрүүл мэндийн зэрэг байгууллагуудтай хамтран хэрэгжүүлдэг хамтын ажиллагааны төсөл юм.

Тухайн орон нутгийн ард иргэд үр ашгийг нь шууд хүртэх боломжтой төслүүдэд санхүүжилт олгодог бөгөөд санхүүжилтийн дэмжлэг үзүүлэхэд Япон Улсын гадаад дахь дипломат төлөөлөгчийн газрууд голлох үүргийг гүйцэтгэдэг гэж Япон Улсын Элчин сайдын яам мэдээлэв.