Гадаадын иргэн, харьяатын газар 2025 оны эхний арваннэгдүгээр сарын байдлаар төлөвлөгөөт 41, төлөвлөгөөт бус 253 удаагийн хяналт шалгалтыг зохион байгуулжээ.

Шалгалтаар гадаадын 16,881 иргэн болон 3,582 аж ахуйн нэгж, байгууллагад Зөрчлийн тухай хуулийн дагуу арга хэмжээ авч, 1,222 иргэнийг албадан гаргасан байна.

Зөрчил гаргасан нийт гадаадын иргэдийн тоо өмнөх оны мөн үеэс 66.7 хувиар өссөн бол хувь хүнээр зөрчил гаргасан иргэд 5.21 хувиар, уригч хуулийн этгээдээр зөрчил гаргасан иргэд 84.07 хувиар тус тус нэмэгдсэн үзүүлэлттэй байна.

Гадаадын иргэдийн нийтлэг зөрчилд:

• Хил орчмын нутаг дэвсгэрт зөвшөөрөлгүй зорчих
• Оршин суух зөвшөөрлийн хугацаа хэтрүүлэх
• Эрх бүхий байгууллагын зөвшөөрөлгүй хөдөлмөр эрхлэх
• Ирсэн зорилгоосоо өөр үйл ажиллагаа явуулах
• Визийн хугацаа хэтрүүлэх гэдэг зөрчлүүд голлон багтжээ.

Мөн ирсэн зорилгоо тодорхойлж чадаагүй, зорчих зорилгодоо нийцээгүй ангиллын визтэй ирсэн, тухайн улсад байх, буцаж явах хөрөнгийн эх үүсвэрийн баталгаагүй, визийн хүчинтэй хугацаа дууссан үндэслэлээр 32 улсын 1,556 гадаадын иргэнийг улсын хилээр оруулалгүй буцаасан байна.  Буцаасан иргэдийн ихэнх нь БНХАУ, БНСУ-ын  иргэд байжээ.

Эх сурвалж: Гадаадын иргэн харьяатын газар