Хууль зүйн салбарын 2026 оны төсвийн төсөлд олон нийтийн санал авах хэлэлцүүлэг эхэллээ.

Хэлэлцүүлэгт иргэд, иргэний нийгмийн байгууллага, Төсвийн тогтвортой байдлын зөвлөл, Төрийн аудитын байгууллага, Санхүү, төсвийн асуудал эрхэлсэн төрийн захиргааны төв байгууллагуудын 150 орчим төлөөлөл оролцов.

Хэлэлцүүлгийн эхэнд Хууль зүй, дотоод хэргийн яамны Төрийн нарийн бичгийн дарга Н.Мягмар тус салбараас ирэх жил тэтгэвэрт гарах алба хаагчдад олгох мөнгөн тэтгэмжийн талаар танилцууллаа. Тэрээр"

• "Цэргийн алба хаагчийн тэтгэвэр, тэтгэмжийн тухай хууль"- н 19.1, 19.2-т заасан нөхцөлөөр тэтгэвэр тогтоолгох 1421 алба хаагчид 124.8 тэрбум төгрөг
• "Төрийн албаны тухай хууль"- н 46.2.2, 46.2.3-т заасан нөхцөлөөр тэтгэвэр тогтоолгох 85 алба хаагчид 2.8 тэрбум төгрөг
• "Хөдөлмөрийн тухай хууль"-д заасан нөхцөлөөр тэтгэвэр тогтоолгох 1 алба хаагчид 17.9 сая төгрөгийн тэтгэмж тус  тус олгох тооцоолол гарсан. Нийт 1507 алба хаагчид 127.6 тэрбум төгрөгийн тэтгэмж олгох тухай асуудлыг ирэх оны төсөвт тусгасан" гэв.

Мөн хууль зүйн салбарт ирэх онд нийт 2370 орон тоо нэмэх шаардлагатай бөгөөд үүнийг дагаад төсөв 104.3 тэрбум төгрөгөөр нэмэгдэх тооцоолол гарсан.

Улсын бүртгэлийн ерөнхий газрын 21 аймаг дахь салбар хэлтсээс 15 нь автомашингүй, Шүүх шинжилгээний Ховд, Өвөрхангай аймаг дахь бүсийн төвүүд өөрийн байргүй гэхчлэн хууль сахиулах үйл ажиллагаа дахь хүний нөөц, хангамжийн олон бэрхшээл байгаагаас зайлшгүй шаардлагатай гэсэн хөрөнгө оруулалт, урсгал зардлыг 2026 оны төсвийн төсөлд багтаагаад байна.

Түүнчлэн Гадаадын иргэн харьяатын газар, Архивын ерөнхий газар зэрэг салбарын хэмжээнд хэрэгжүүлж, амжилт гаргасан цахимжуулалтын ажлын үр дүнг тогтвортой хадгалах зорилго бүхий программ хангамжийн сайжруулалт, хиймэл оюунд суурилсан хөгжүүлэлт, кибер аюулгүй байдлыг хангах чиглэлд хөрөнгө оруулалт зайлшгүй шаардлагатай байгааг харьяа агентлаг, байгууллагын удирдлагууд энэ үеэр танилцууллаа. 

Хэлэлцүүлгээс гарсан саналуудыг нэгтгэж хууль зүй, дотоод хэргийн салбарын 2026 оны төсвийн төсөлд тусгах талаар Санхүү, төсвийн асуудал эрхэлсэн төрийн захиргааны төв байгууллагад хүргүүлнэ. Иймд иргэдийн саналыг энэ сарын 14-нийг дуустал 11-11 төв болон И-Монголиа системээр хүлээн авна.