Ерөнхийлөгчийн ивээл дор “Дэлхийн бизнес эрхлэгч эмэгтэйчүүдийн чуулга уулзалт”-ыг энэ сарын 25, 26-нд нийслэлд зохион байгуулна.

Тус чуулга уулзалт нь бизнесийн салбарт эмэгтэйчүүдийн оролцоог нэмэгдүүлэх, тэдний харилцаа холбоо, хөрөнгө оруулалтын боломжийг өргөжүүлэх, жендерийн эрх тэгш байдлыг дэмжих зорилготой.

Дээд хэмжээний энэ уулзалтад 22 орны 230 төлөөлөгч, дэлхийн нөлөө бүхий бизнес эрхлэгчид, удирдах албан тушаалтнууд, нийгэм, улс төр, соёлын салбарын төлөөллүүд оролцоно.

Урам зориг өгөх, нийгэмд эергээр нөлөөлөх, хөрөнгө оруулах уриатай энэ уулзалтын төлөвлөгөөнд залуу охидод зориулсан хөтөлбөр, зургаан салбар хуралдаан, бизнесийн үзэсгэлэн худалдаа, соёлын үйл ажиллагаа багтсан гэв.

МҮХАҮТ-ын Ерөнхий нарийн бичгийн дарга Б.Саруул, чуулга уулзалтаар хөрөнгө оруулалт, бизнесийн эрх зүйн орчин, цахим худалдааны боломж зэрэг сэдвээр ярилцах хоёр гол хэлэлцүүлэг төлөвлөсөн.

Мөн Дэлхийн худалдааны байгууллагаас олгосон нэг сая ам.долларын тэтгэлгийг шалгарсан 50 эмэгтэй бизнес эрхлэгчид гардуулна. Төв талбайд гурван өдөр үргэлжлэх, 150 компанийн үзэсгэлэн худалдаа зохион байгуулж, 21 аймгаас бизнес эрхлэгчид оролцоно гэлээ.

Томоохон компани гэлтгүй жижиг, дунд бизнес эрхлэгч эмэгтэйчүүд олон улсын төлөөлөгчидтэй холбогдох боломж бүрдэх аж.

Ерөнхийлөгчийн төсөл, хөтөлбөрийн зохицуулалт, иргэний нийгмийн бодлогын зөвлөх Б.Жавхлан, сүүлийн гурван жил дараалан эмэгтэйчүүдийг дэмжих олон улсын чуулга уулзалтыг зохион байгуулснаар манай улс НҮБ-ын гишүүн орнуудаас өндөр үнэлгээ авч, бүс нутагтаа байр сууриа бэхжүүлсэн.

Монголчууд аль ч засаглалын үед эмэгтэйчүүдийн дуу хоолой, оролцоог эрхэмлэж ирсэн соёл уламжлалтай. Үүнийгээ гадаад бодлогоор дамжуулан дэлхий дахинд сурталчилж буй. Ерөнхийлөгч У.Хүрэлсүх мөн феминист гадаад бодлогыг эрхэмлэн баримталдаг гэв.

Манай улс сүүлийн жилүүдэд жендерийн эрх тэгш байдлыг дэмжих зорилгоор олон улсын түвшинд хэд хэдэн чуулга уулзалт зохион байгуулсан.2022 онд Энхийг сахиулагч эмэгтэйчүүдийн олон улсын анхдугаар хурал, 2023 онд Гадаад хэргийн эмэгтэй сайд нарын уулзалт, 2024 онд Дэлхийн эмэгтэйчүүдийн уулзалтыг Ерөнхийлөгчийн нэр дор тус тус хэрэгжүүлжээ.

Энэ удаагийн чуулга уулзалт нь бизнес эрхлэгч эмэгтэйчүүдийн түншлэл, хамтын ажиллагааг бэхжүүлэх, хөрөнгө оруулалт татах, мөн дэлхий дахинд бизнес эрхлэгч эмэгтэйчүүдэд тулгамдаж буй нийтлэг сорилтуудыг шийдвэрлэх гарц шийдлийг хэлэлцэх чухал индэр болох юм.

Ерөнхийлөгчийн Тамгын газар, Монголын үндэсний худалдаа аж үйлдвэрийн танхим болон төр, хувийн хэвшлийн байгууллагууд хамтран зохион байгуулж, НҮБ-ын Ази, Номхон далайн эдийн засаг, нийгмийн комисс, Дэлхийн худалдааны байгууллага, Олон улсын худалдааны төв, Европын холбооны олон улсын худалдааны төсөл зэрэг олон улсын байгууллагууд дэмжин оролцоно.

Э.Болор-Од