Өнөөдрийн Засгийн газрын ээлжит хуралдаанаас гаргасан зарим шийдвэрийг танилцуулж байна. Монгол Улсын Сайд, Засгийн газрын Xэрэг эрхлэх газрын дарга С.Бямбацогт мэдээллээ.

"Компаниудын үр ашгийг нэмэгдүүлэх бодлого барина. Төр оролцохгүй, иргэн, ААН, хувийн хэвшил аваад явчих компаниудыг хувьчилна. Хувьчилна гэхээр худалдана, хуйвалдана гэсэн утгаар буруу ойлгох гээд байдаг. Энэ бол олон нийтэд ил тод нээлттэй хувьцааг бирж дээр зарна.  Мөн дуудлага худалдаагаар худалдана. Төр хувийн хэвшилтэй өрсөлдөхгүй гэсэн үг. 

Дараах төрийн өмчит компаниудыг худалдана. Ингэснээр үйл ажиллагаа нээлттэй болно. 

1. Монголын цахилгаан холбоо ХК
2. Хөдөө аж ахуйн бирж
3. Үндэсний давхар даатгал ХК
4. Монголын хөрөнгийн бирж
5. Шивээ овоо ХК
6. Багануур ХК
7. МИАТ ХК
8. Төрийн банк зэргийг олон нийтэд нээлттэй, хөрөнгийн биржээр дамжуулж, нэмэлт хувьцаа гаргах замаар компанийн үйл ажиллагааг ил тод, хөрөнгийн чадавхыг сайжруулах зорилгоор худалдана.

Мөн "Эрдэнэс таван толгой" ХК, Эрдэнэт ТӨҮГ-ийн нэмэлт хувьцаа гаргаж, олон нийтийн хяналтыг нэмэгдүүлнэ. Дулааны цахилгаан станцууд бүхий төрийн өмчит компаниудыг дуудлага худалдаагаар иргэн, ААН-үүдэд худалдана.

Татан буулгах компаниуд "Авто импекс" ХК, Төвийн бүсийн хүнс хөнгөн үйлдвэрийн цогцолбор, Авто зам ашиглалтын нэгтгэл зэрэг компаниуд байна. 

Ийнхүү төрийн 100 гаруй компанийн 30 гаруй нь олон нийтийн оролцоотой, нээлттэй ил тод хувьцаат компани болгож, зарим нь дуудлага худалдаагаар хувьчлагдах болно.