НИТХ-ын төлөөлөгч Б.Эрдэнэсүхийн эхнэр О.Нарангарав гэх эмэгтэй 22 жилийн турш нөхөртөө зодуулж, хүнд гэмтлүүд авсан. Энэ асуудлаар цагдаагийн байгууллагад хандсан боловч хариу өгдөггүй, шийдэгдэхгүй өнөөг хүрсэн гэж өөрийн амьдрал, нөхрийнхөө хүчирхийлэл, яргаллын талаар хэвлэлд илэн далангүй ярив. Энэ мэдээлэл олныг хирдхийлгэж, НИТХ-ын төлөөлөгч Б.Эрдэнэсүхэд хариуцлага тооцохыг шаардаж эхэллээ.

Иргэн О.Нарангарав энэ асуудлаар хууль хяналтын байгууллагаас гадна НИТХ-д хандсан гэж ярьсан. Энэ талаар НИТХ-аас тодруулахад,

НИТХ-ын төлөөлөгч Б.Эрдэнэсүхтэй холбоотой асуудлаар гэр бүлийн хүн нь 2025 оны 9-р сарын дундуур гомдол гаргасныг НИТХ-ын Ажлын алба хүлээж авсан. Уг гомдлыг судлаад, гомдол гаргагч болон нэр дурьдагдсан төлөөлөгчийн аль алиныг хүлээн авч уулзаж, тухайн үед шаардлагатай шийдвэрийг гаргасан. 

Гомдол гаргагч тал хоёр дүүргийн Цагдаагийн байгууллагад хандсан гэж мэдэгдэж байсан. Нэгэнт цагдаагийн байгууллагад хандсан, гомдолд илэрхий гэмт хэргийн шинжтэй үйлдэл дурьдагдсан учир хуулийн байгууллагаар шалгуулах нь зүйтэй гэж үзсэн.  

Ёс зүйн зөрчил удаа дараа гаргасан бол хуулиар төлөөлөгчийг огцруулах асуудал тавигдана. Гэтэл гомдолд дурьдагдсан үйлдэл нь НИТХ-аас 2017 онд тогтоосон Ёс зүйн дүрэмд хамаарах асуудал биш, илэрхий гэмт хэргийн шинжтэй, хүний эрх, эрх чөлөөнд халдсан асуудал байх тул хууль хяналтын байгууллага шалгаж, гэм буруутай эсэхийг тогтоох нь зүйтэй гэж манай байгууллага шийдвэрлэсэн.

Нийслэлийн прокурорын газраас иргэн О.Нарангаравыг онц хэрцгийгээр зодож, хүчирхийлсэн асуудлаар яллагдагчаар татаж, хяналт тавин ажиллаж байна гэж өнөөдөр /2025.10.15/ мэдэгдэв.