УИХ-ын гишүүн Н.Наранбаатар нарын 38 гишүүн УИХ дахь МАН-ын бүлгийг яаралтай хуралдуулах шаардлагыг МАН-ын бүлгийн Ажлын албанд өгчээ. 

Тэрбээр, МАН-ын бүлгийн гишүүдийн олонх буюу 38 гишүүний гарын үсэг зурсан шаардлагыг бүлгийн дарга байхгүй тул, Ажлын албанд өглөө. МАН-ын бүлэг сүүлийн хоёр удаа хуралдсангүй. Бид 10-р сарын 9-ний өдөр цөөн гишүүний гарын үсэгтэй бүлгийг яаралтай хуралдуулах шаардлага хүргүүлсэн ч хуралдаагүй. Өнөөдөр бүлгийн гишүүдийн олонх гарын үсэг зурлаа. Хугацаа их алдаж байгаа тул өнөөдрийн 16.00 цагт хуралдуулах шаардлага тавилаа. 

Өнгөрсөн зун баруун аймгуудад гантай байсан, зуд болох эрсдэлтэй. 2026 оны улсын төсвийг хэлэлцэх цаг хугацаа тулж байна. Нэг хэсэг гишүүд Засгийн газраа огцруулах санал гаргалаа, нэг хэсэг нь УИХ-ын даргыг огцруулах тогтоолын төсөл өргөн бариад байна. 

-Бүлгийг яагаад хуралдуулахгүй байгаа талаар та бүхэнд хариу өгсөн үү? 
-Албан ёсны хариу өгөөгүй. Албан бусаар бол намын Удирдах зөвлөлийг эхлээд хуралдуулах ёстой гэж байна. Төрийн ажил тасралтгүй үргэлжлэх ёстой. Улс төрийн намын үйл ажиллагаа тусдаа асуудал. Нам, төрийн ажлыг ялгаж салгах ёстой. Намын удирдах зөвлөлд Ерөнхий сайдыг огцруулах, томилох асуудлыг ярих зохицуулалт байхгүй. Энэ асуудлыг бүлгийн хурлаар хэлэлцэж, улс төрийн шийдвэр гаргах шаардлагатай. 

-Хэрэв 16.00 цагт хуралдахгүй бол яах вэ?
-Хуралдахгүй бол бүлгийн гишүүдийн олонх 38 гишүүн хурлаа явуулах боломжтой. Бүлгийн дөрвөн дэд даргын нэг нь хурал удирдаад явна.