Ерөнхий сайдаас Хууль зүй, дотоод хэргийн сайдын томилгоотой холбоотой танилцуулга ирсэн эсэх, УИХ ирэх оны төсвийг хуулийн хугацаанд баталж чадахгүй бол тарах уу? гэсэн сэтгүүлчдийн асуултад УИХ-ын Ерөнхий нарийн бичгийн дарга Б.Баасандорж хариуллаа.

Тэрээр, Монгол Улсын Засгийн газраас, Ерөнхий сайдаас 2025 ны аравдугаар сарын 01-ний өдрийн дугаартай албан бичгээр өчигдөр Улсын Их Хуралд саналаа ирүүлсэн.

Үндсэн хуулийн 39.4-д “Засгийн газрын гишүүнийг Улсын Их Хурал, Ерөнхийлөгчид танилцуулснаар Ерөнхий сайд томилж, чөлөөлж, огцруулна.” гэж заасан. Үүргээ биелүүлж байж, эрхээ эдэлдэг. Өөрөөр хэлбэл, Улсын Их Хурал, Ерөнхийлөгчид танилцуулах үүрэгтэй.

Энэ хоёр үүргээ хэрэгжүүлж байж, эрх нь хэрэгждэг. Энэ эрхийн хүрээнд Ерөнхий сайд бичгийг УИХ-д ирүүлсэн. Танилцуулахаар ирүүлсэн танилцуулгыг Монгол Улсын Их Хурлын тухай хууль, Дэгийн тухай хуульд заасны дагуу хэлэлцэнэ.

Өнөөдөр чуулганы нэгдсэн хуралдаанаар хэлэлцэх тов байхгүй. Улсын Их Хурлын тухай хуулийн 13 дугаар зүйлийн 13.3 дахь хэсэгт зааснаар ээлжит болон ээлжит бус чуулганаар хэлэлцэх асуудлын тов, дарааллыг УИХ-ын даргын дэргэдэх зөвлөл тогтоодог.

Тэр тусмаа тухайн долоо хоног бүр Байнгын хороо, Дэд хороо, Түр хороо, Хянан шалгах хороогоор ямар асуудал хэлэлцэхийг товлодог. Энэ долоо хоногт хэлэлцэх асуудлын тов гарчихсан. Товын дагуу чуулганы нэгдсэн хуралдаанаар өнөөдөр хуралдаад, Хөдөө аж ахуйн тухай хууль, Хүнсний тухай хуулийн төслийг хэлэлцлээ.

Үдээс хойш дэд хороо, ЭЗБХ, ТБХ-ны хамтарсан хуралдаантай. Одоогоор дээрх асуудал товд ороогүй байна гэсэн гэв.

Эх сурвалж: parliament.mn