Африк тивийн зүүн эрэг дагуу байрладаг БН Маврики улс дахь тээвэрлэгч усан онгоцноос их хэмжээний нефть далайд асгарч буй тул тус улсад онц байдал зарлалаа. "MV Wakashio" гэх усан онгоц долоодугаар сарын 25-нд Маврики арал улсын шүрэн хадтай эрэгт хайргадсан бөгөөд онгоцны багийнхныг нүүлгэн шилжүүлээд байв.

Гэвч тээвэрлэгч усан онгоцноос нефть асгарч эхэлсэн тул Маврики улсын Ерөнхий сайд Правинд Жүгнаут "байгаль орчны онц байдал" зарлажээ. Тэрээр мөн Францын Ерөнхийлөгч Эммануэль Макронд хандан "хайргадсан усан онгоцыг зохицуулах туршлага, ур чадвар байхгүй" гэдгээ мэдэгдсэн байна. 

Учир нь Маврики улсын арлаас 226 км-ын зайд Францын харьяа Реюнион арал байрладаг аж.

Маврики нь дэлхийд алдартай шүрэн хадны өлгий нутаг бөгөөд эдийн засгийн ихэнх хувийг аялал жуулчлал эзэлдэг. Байгаль орчин хамгаалах "Greenpeace Africa" байгууллагын мэргэжилтэн Хаппи Хамбуле "Хэдэн мянган амьтан ургамал далайн бохирдолд живж улмаар Маврики улсын хүнсний аюулгүй байдал, эрүүл мэнд, эдийн засагт сөргөөр нөлөөлөх эрсдэлтэй" гэжээ.

Хятадаас Бразилыг чиглэн явж байсан уг усан онгоцыг Японы нэгэн компани эзэмшдэг ба сүүлд Панам улсад бүртгэгдэхэд хоосон байсан ч 4000 тонн түлш усан онгоц дээр байгаа гэсэн мэдээллийг албаныхан өгчээ.

Далайн давлагаанаас болж хөлөг онгоцыг тэнцвэржүүлэн түлшийг шахах ажил бүтэлгүйтсэн гэж тус улсын Байгаль орчны сайд хэлсэн байна.

Эх сурвалж: BBC, AlJazeera