Монголбанкны өнөөдрийн зарласан ханш 3455 төгрөг байна. Сүүлийн нэг жилийн хугацаанд төгрөгийн ханш ам.долларын эсрэг 1.60 хувиар суларчээ. 2024 оны хоёрдугаар сарын 1-нд нэг ам.доллар 3401 төгрөг байжээ.

Жилийн эхний саруудад төгрөгийн ханш тогтвортой байсан ч өнгөрсөн есдүгээр сараас хойш алгуур өсжээ. Монголбанкнаас ханшийн хөдөлгөөнийг ингэж тайлбарлав.

-Жилийн дунджаар харахад тодорхой үеүдэд буюу 9-10-р сард ажил үйлчилгээ идэвхжихэд, Сар шинийн баярын өмнө гэх мэт эрэлт нэмэгддэг үеүдэд ханш хэлбэлздэг. Сүүлийн жил, саруудад гадагш чиглэлтэй аялал жуулчлал нэмэгдсэн, автомашины импорт мөн том дүнгээр нэмэгдсэн нь нөлөөлөв.

Мөн улирлын чанартайгаар, уул уурхайн зарим үйлдвэрлэл саармагждагтай холбоотойгоор валютын орох урсгал саардаг. Гэсэн ч гадаад валютын улсын нөөц 2024 оны эцсээр  5.5 тэрбум долларт хүрч,  түүхэн дээд хэмжээнд очсон. Одоо байгаа 4.9 тэрбум орчим долларын нөөц маань валютын төлбөртэй барааны төлбөрийн таван  сарын хэрэглээг хангахуйц хэмжээ юм.

Олон Уулсад тавигддаг шаардлага, стандартад гурван сарын хэрэглээний төлбөрийг  хангахад хангалттай гэдэг. Банкнууд ямар нэг байдлаар валютын хязгаарлалт мөрдүүлээгүй, Монголбанкны зүгээс банкнуудаас ирүүлсэн валютын худалдан авалтын захиалгыг хүссэн дүн хэмжээнд нь биелүүлж байна. Иймд валютын хязгаарлалт тогтоох асуудал үүсээгүй.

Том дүр зургаараа дан ганц дотоодын гэлтгүй гадаад зах зээлээс, тэр дундаа АНУ-БНХАУ-ын хооронд үүссэн худалдааны "дайн", үнэ тарифын асуудал  манай эдийн засагт зохих нөлөө үзүүлэх эрсдэл, дарамт бодитоор бий болсон гэв.