Засгийн газраас бүсчилсэн хөгжлийн бодлого явуулахаа зарласан. Энэ дагуу аймаг, сумдад ажилладаг төрийн албан хаагчдын цалинг нэмж, орон нутагт ажлын байр түлхүү бий болгох, 3 хувийн хүүтэй, ипотекийн зээл олгох шийдвэр гарсан.

Тэгвэл ирэх оноос эхлэн бүсүүдэд өөр өөр татвар ногдуулна. Мөн бүтээн байгуулалтын төслүүдийг дэмжихийн тулд энэ төрлийн төсөлд ашиглах тоног төхөөрөмжийг гаалийн татвараас чөлөөлж, НӨАТ төлөх хугацааг дөрвөн жилээр хойшлуулна. Тухайн бүтээн байгуулалт дуусаж, үйл ажиллагаа эхэлсэн цагаас эхлэн үл хөдлөх хөрөнгийн татвар төлдөг болохоор 2025 оны улсын төсвийн төсөл, дагалдан өргөн барьсан төслүүдэд заажээ.

Мөн боловсруулах үйлдвэрүүдийг дэмжиж, гаалийн татвараас 100 хувь чөлөөлнө. Эдгээр хөнгөлөлт чөлөөлөлтийг хэрэгжүүлснээр улсын төсвийн орлого буурахгүй гэв. Учир нь дээрх зохицуулалтууд нь одоогийн орлогыг биш ирээдүйн орлогыг дэмжих зорилготой.    

Сангийн яам ирэх онд манай улсын ДНБ 95 их наяд төгрөгт хүрч, нэг хүнд ногдох ДНБ 7900 ам.доллар болно гэж тооцоолжээ. Ингэснээр өрхийн хэрэглээ өсөх тул ХХОАТ, НӨАТ дагаад нэмэгдэнэ гэж үзэж байна.               

Монгол Улсыг эдийн засгийн “Хангайн, Баруун, Хойд, Төвийн, Зүүн, Говийн, Улаанбаатарын” гэсэн долоон бүсчлэлийн тогтолцоогоор хөгжүүлэхээр өнгөрсөн зургаадугаар сард тодорхойлсон юм.

Хангайн бүс: Архангай, Баянхонгор, Өвөрхангай аймаг; 
Баруун бүс: Баян-Өлгий, Говь-Алтай, Завхан, Увс, Ховд аймаг;  
Хойд бүс: Булган, Орхон, Хөвсгөл аймаг; 
Төвийн бүс: Дархан-Уул, Сэлэнгэ, Төв аймаг; 
Зүүн бүс: Дорнод, Сүхбаатар, Хэнтий аймаг; 
Говийн бүс: Говьсүмбэр, Дорноговь, Дундговь, Өмнөговь аймаг; 
Улаанбаатарын бүс: Улаанбаатар ба дагуул хот