Ирэх сараас 1-нээс орон нутгийн тээврийн хэрэгсэл нийслэлд 48 цагаас дээш хугацаанд зорчвол жолооч хоног тутамд 5000 төгрөг төлнө.

Улаанбаатарт өдөрт дунджаар орон нутгийн дугаартай 16-19 мянган тээврийн хэрэгсэл замын хөдөлгөөнд оролцдог. Баяр ёслолын үеэр 38 мянга болдог байна. Иймд эдгээр тээврийн хэрэгслийг бууруулах зорилгоор НИТХ-ын 2024 оны хоёрдугаар сарын 8-ны өдрийн тогтоолоор авто зам ашигласны төлбөрийн хэмжээг шинэчилсэн юм. 

Улаанбаатарт орон нутгаас наймдугаар  сарын 15-аас есдүгээр сарын 15-ний хооронд 19 мянга гаруй тээврийн хэрэгсэл ирж замын хөдөлгөөнд оролцдог гэх судалгаа бий.

Хотын даргын захирамжаар түгжрэлийн бууруулахаар Улаанбаатарт нэвтэрч байгаа орон нутгийн дугаартай тээврийн хэрэгсэл

•     48 цаг дотор 1000 төгрөг,
•     48 цагаас дээш тохиолдолд хоногт 5000 төгрөгийн хураамж авах төлөх болсон. Тус захирамж есдүгээр сарын 1-нээс хэрэгжиж эхэлнэ.

Одоогоор 22-ийн товчоо, 61-ийн гарам, эмээлт зэрэг авто тээврийн шалган нэвтрүүлэх цэгт камер байршуулжээ. Тус камерын тусламжтайгаар орон нутгийн тээврийн хэрэгслийн орж, гарч байгаа мэдээллийг бүртгэнэ гэж Нийслэлийн олон нийттэй харилцах газраас мэдээллээ.

Энэ талаар Нийслэлийн замын хөгжлийн газрын Захиргаа, санхүүгийн хэлтсийн ахлах мэргэжилтэн Ө.Төрбат “Захирамжийн хэрэгжилтийг хангуулах хүрээнд есдүгээр сарын 1-нээс нийслэл рүү нэвтэрч буй орон нутгийн тээврийн хэрэгслээс 5000 төгрөгийн нэхэмжлэл үүсгэж илгээж эхэлнэ. Хуримтлагдсан мөнгийг авто замын засвар, шинэчлэлийн ажилд зарцуулна” гэв.

Улаанбаатар хотын захирагч Х.Нямбаатар “Улаанбаатар бол Монгол Улсын нийгэм, эдийн засгийн төв учир хот руу чиглэсэн хөдөө орон нутгийн хөдөлгөөний урсгал байдаг.

Тиймээс малчид малын махаа худалдах, бизнес эрхлэгчид хүнс бараагаа татах зэрэгт төлбөрийн хураамжийн асуудал хөндөгдөхгүй.Харин  орон нутгаас ирж такси үйлчилгээ эрхлэх тохиолдол их байдаг.  Энэ нь нээлттэй хэдий ч түгжрэлийн нөлөөллийг бууруулах үүднээс дээрх захирамж гарсан” гэж мэдээлж байсан юм.

А.Саранчимэг