УИХ-ын чуулганы хуралдаан эхэллээ. Хуралдаан 76 гишүүний ирцтэйгээр эхэлж байна. Өнөөдөр дөрвөн асуудлыг хэлэлцэнэ. 

• 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүдийн хоёр дахь хэлэлцүүлэг
• Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг үргэлжлүүлнэ.
•  Монгол Улсын нэгдсэн төсвийн 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд өөрчлөлт оруулах тухай хуулийн төслийн анхны хэлэлцүүлгийг явуулна.

УИХ-ын дарга Д.Амарбаясгалан: Өчигдөр Ж.Галбадрах гишүүн 24 дэх асуудалд горимын санал гаргая гэсэн ч өөрөө байгаагүй. Нэг дүүрэгт гүйцээн барих төсөвтэй цэцэрлэгийн барилгын төсвийг татаад хоёр дүүрэгт шинээр цэцэрлэг худалдаж авах төсөв болгоно гээд санал оруулсан байсан. Үүнийг мэргэжлийн байнгын хороо дэмжихгүй гэсэн саналтай байсан. Гишүүн өөрөө татах саналтай байж байгаад санал хураалтын үед байгаагүй. Тэрнээс болоод санал нь УИХ-д дэмжигдээд явж байна. 

Зарчмын зөрүүтэй 24 дэх асуудлын талаар Ж.Галбадрах гишүүн, БГД-ийн Нарны хороолол, ХУД-т байсан хоёр цэцэрлэг хүчин чадлаасаа давсан хүүхдүүдийг сургаж байна. Ирэх жилээс 718 хүүхэд цэцэрлэггүй болох эрсдэлтэй байгаа учир бид тэдгээр цэцэрлэгийг худалдаж авах шаардлагатай л гэсэн юм.

Боловсролын төлөөллийн хувьд нэг ч гэсэн цэцэрлэгийг хасуулчихгүй гээд санал тавьсан. Үүнд ямар нэг лобби байгаагүй. Саналаа татаж авч байна гэв. 

Соёл, спорт, аялал жуулчлал, залуучуудын сайдын төсвийн багцын “Соёлын эрхийн бичиг” арга хэмжээний зардлыг 18 тэрбум 325.9 сая төгрөгөөр бууруулах саналыг УИХ-ын гишүүн Ж.Баярмаа гаргасан. 

Энэ саналыг Боловсрол, соёл, шинжлэх ухаан, спортын байнгын хороо болон Төсвийн байнгын хороо дэмжээгүй бөгөөд үүнийг нь дэмжье гэсэн саналын томьёоллоор санал хураалт явуулахад 54 гишүүн буюу 58.7 хувь нь дэмжив.

Өөрөөр хэлбэл Ч.Номин сайдын 18.3 тэрбум төгрөгийн багц хэвээр үлдэж байна.

Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх нь зүйтэй гэж гишүүдийн олонх үзсэн тул анхны хэлэлцүүлэгт бэлтгэхээр Аюулгүй байдал, гадаад бодлогын байнгын хороо, төсвийн байнгын хороо, эдийн засгийн байнгын хороонд шилжүүлэв. 

Төсвийн байнгын хороо хуралдаж, Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүдийн хоёр дахь хэлэлцүүлгийг тодорхой асуудлын хүрээнд дахин явуулах тул чуулганы хуралдааныг түр завсарлав.