Францын Европ, Гадаад хэргийн сайд Катерин Колонна манай улсад айлчилж байна. Тэрээр эмэгтэй гадаад хэргийн сайд нарын уулзалтад оролцохоор Улаанбаатарт иржээ.

“Бадрах энержи” компанийн толгой компани болох “Орано майнин” Засгийн газрын хооронд байгуулах гэрээг урагшлуулах нь Коллона сайдын бас нэг зорилго юм.

Ройтерс агентлаг “Гэрээний үнийн нэг тэрбум евро. Талууд ирэх есдүгээр сард гэрээг байгуулах хүлээлттэй байна” хэмээн Францын дипломат албаны эх сурвалжийг иш татан мэдээлжээ.

НҮБ-ын Аюулгүйн зөвлөлийн байнгын гишүүн таван орны нэг, цөмийн зэвсэг эзэмшигч, дэлхийн улс төр, эдийн засагт нөлөө бүхий улс болох Францын Ерөнхийлөгч өнгөрсөн сад манай улсад айлчилсан. Энэ айлчлалын зорилго ч нөөцөөрөө дэлхийд дээгүүрт орох, Дорногорь аймаг дахь Зөөвч-Овоо ураны ордын гэрээ байв.

Хөрөнгө оруулалтын гэрээ байгуулах ажлын хэсгийг Монголын талаас ХЗДХ-ийн сайд Х.Нямбаатар ахалсан.

Гэрээний үнийн дүн нэг тэрбум евро буюу өнөөдрийн ханшаар тооцвол 3.7 их наяд төгрөг. Энэ нь манай улсын төсвийн орлогын 1/6-тэй тэнцэнэ.  

Гэхдээ “Орано майнин” энэ  хөрөнгө оруулалтыг ямар хугацаанд оруулах нь тодорхойгүй байна. Францын компанитай байгуулах энэ гэрээ гадаад валютын орлого авчрах, экспортын барааг төрөлжүүлэх, урд хөршөөс хэт хамааралтай гадаад худалдааны эрсдэлийг бууруулах, өндөр хөгжилтэй Франц улстай эдийн засгийн харилцаагаа өргөжүүлэх гэх мэт олон ач холбогдолтой.