ХӨСҮТ-өөс гэдэсний халдварт өвчин нэмэгдэх эрсдэл үүсэж буй талаар мэдээлэл өгөв. Олон нийтийг хамарсан баяр наадам болох гэж буйтай холбоотой гэдэсний өвчний талаар иргэдэд зөвлөмж хүргэлээ.

Энэ үеэр Тандалт судалгааны албаны гэдэсний халдвар тандах тасгийн эрхлэгч н.Амгалан "Дулааны улиралтай холбогдуулан агаар дуслын халдварын тохиолдол буурсан. Гэвч үер усны болзошгүй аюулаас шалтгаалан гэдэсний халдварын тохиолдол нэмэгдэх хандлагатай байна. Наадмын үйл ажиллагаа эхэлсэнтэй холбогдуулан иргэдийн орон нутаг руу зорчих хөдөлгөөн ихэсжээ. Он гарсаар 3800 гаруй хүн гэдэсний халдварт өвчнөөр өвдсөн. Үүний 70-80 хувь нь гар, хөл, амны өвчин байна. Уг өвчнөөр ихэвчлэн 0-4 насны хүүхэд өвддөг.

Он гарсаар 490 гаруй хүн цусан суулгаар өвдсөн байна.

Тиймээс гарны ариун цэврийг маш сайн баримтлах хэрэгтэй. Түүнчлэн 490 гаруй хүн цусан суулгаар өвдсөн. Өнгөрсөн жилтэй харьцуулахад хоёр дахин нэмэгджээ. Иргэд орон нутаг руу аялахдаа хүнсээ зөв сонгох, бага насны хүүхэд идэхэд шаардлага хангаагүй бүтээгдэхүүн авч явахгүй байх хэрэгтэй. Мөн үер ус туулах үед гэдэсний халдвар авах магадлалтай.

Мөн ундны устай холбоотой гэдэсний халдвар авах тохиолдол байна. Голын усыг түүхийгээр нь хүүхдэд өгч болохгүй. Эцэг эх хүүхдийнхээ гарыг угаахаас гадна өөрсдөө маш сайн ариутгах шаардлагатай. Мөн хүнсийг сайтар болгож идэх, түүхий хүнсний бүтээгдэхүүнтэй хольж хэрэглэхгүй байх. Түүхий хүнсэнд гэдэсний халдварын нян байдаг. Болгож хэрэглэх зайлшгүй шаардлагатай.  Гарын ариун цэврийг муу сахиснаар гэдэсний халдвар, цусан суулга тусах магадлалтай. Эцэг эхийн эрүүл мэндийн боловсрол муу учраас хүүхдүүд ихэвчлэн өвдөж байна" гэлээ.