ХӨСҮТ-ийн Дархлаажуулалтын албаны дарга О.Дашпагма томуу, томуу төст болон улаанбурхан өвчний нөхцөл байдлын талаар дараах мэдээллийг өглөө.

-Одооогоор улаанбурхан өвчний найман тохиолдол лабораториор батлагдсан. Таван сартайгаас 38 насны хүмүүс байна. Тэдний гурав нь вакцины товлолт нас хүрээгүй буюу есөн сар хүрээгүй хүүхдүүд.

Вакцинд хамрагдаагүй, 5-14 насны гурван хүүхэд, нэг насанд хүрэгч тус тус халдвар авчээ. Эдгээр хүн товлолын дагуу улаанбурхан, гахайн хавдрын вакциндаа хамрагдаагүй байсан тул өвджээ.

Найман тохиолдлын тав нь Вьетнам гэх мэт орнуудаар аялаад  ирсэн байна. Тэд аялах хугацаандаа халдвар авч, Монголд ирээд оношлогджээ.

Товлолт вакцин хийлгэх сардаа хүрээгүй буюу 9-өөс доош сартай хүүхдүүд улаанбурханы халдвар авсан нь анхаарал татаж байна. Эцэг эхчүүд бага сартай хүүхдээ олон нийтийн газраар авч явахгүй байхыг зөвлөе. 

Харин 9-өөс дээш сартай хүүхдүүдээ товлолт вакцинд цагт нь хамруулаарай. Ингэснээр улаанбурхан, улаанууд өвчнөөс сэргийлэх боломжтой. Энэ вакцины хоёр дахь тунг хоёр настайд нь хийдэг. Та хүүхдээ товлолт вакцинд хамрагдсан эсэхийг шалгаад, хамруулаагүй бол өрхийн, сумын эрүүл мэндийн төвд хандаарай.

21 аймаг, нийслэлийн 9 дүүрэгт дархлаажуулалтын 600 орчим нэгж ажилладаг. 2018 оноос хойш төрсөн хүүхдийн вакциныг И-Монголиа аппликэйшнээс нягтлах боломжтой. Мөн эх хүүхдийн  эрүүл  мэндийн ягаан дэвтэр дээр нь тухайн хүүхдэд вакцин тарьсан, эсэхийг бичдэг. Хоцорсон бол хүүхдээ нөхөн дархлаажуулалтад идэвхтэй хамруулаарай.

Бид тандалт судалгаа,  хариу арга хэмжээг авч байна гэв.