#Paris2024 Паралимпын усанд сэлэлтийн төрөлд оролцож буй Монголын анхны тамирчин Хүрэлийн Номуун

Парис 2024 паралимпын наадамд Монголын шигшээ багийн салхийг хагалж Хүрэлийн Номуун усанд сэлэлтийн төрөлд өрсөлдлөө.

17 настай Х.Номуун пара усанд сэлэлтийн S6 ангиллын эмэгтэй 50 метрийн чөлөөт сэлэлтийн төрөлд уралдаж 13-р байр эзэллээ.

Түүний төрөлд нийт 14 тамирчин өрсөлдсөн бөгөөд эхний найм нь финалд шалгарав. Х.Номуун 50 метрийг 47.77 секундэд туулсан нь нэгдүгээр байрт жагссан Хятадын тамирчнаас 15.07 секундээр хоцорсон үзүүлэлт юм.

Монголын шигшээ баг энэ жил анх удаа Паралимпын усанд сэлэлтийн төрөлд оролцож байгаа бөгөөд Х.Номуун мөн 2022 оны Азийн наадамд оролцож анхны гэх амжилтыг тогтоож байв.

Тэрээр есдүгээр сарын 7-д эмэгтэй 100 метрийн араар сэлэлтийн төрөлд дахин өрсөлдөнө.

Х.Номуун S6 ангилалд хамаардаг. Энэхүү ангилалд биеийн нэг талын хөдөлгөөний хязгаарлагдмал, биеийн доод хэсэг болон хөлийн хөдөлгөөний бэрхшээлтэй, үе мөч богино эсвэл аль нэг мөч байхгүй хүмүүсийг хамаардаг. Энэ төрлийн усанд сэлэлтийн тамирчид гараанаас гарахдаа усан дотор, тавцан дээр суугаад, эсвэл зогсоод гэх мэт олон төрлийн байрлалыг эзэлж болдог.