УИХ-ын Хууль зүйн байнгын хороогоор "Ноорог"-ийн контент бүтээгчдийг шөнө саатуулан байцаасан асуудлыг хэлэлцэв.  Энэ үеэр УИХ-ын гишүүн Ч.Лодойсамбуу байр сууриа илэрхийлэв.

-Төр юмыг тойруулдаг, бөөрөнхийлдөг, аргалдаг нь Цагдаагийн Хуулийн хэлтсийн даргын хариултаас илт байна. "Ноорог"-ийн гурав биш нэг л хүнийг хорьсон шүү дээ. Гэтэл та нар гурав гээд яагаад буруу мэдээлэл өгөөд байгаа юм бэ?

Юу болсныг би сэтгүүлчээр ажилласны хувьд хэлье. Үзэл бодлоо илэрхийлсний төлөө би ч саатуулагдаж байв. Юу болсон бэ гэхээр энэ залуусын хийсэн видеог олж үзэх гэсэн. Тэгээд тэдний компьютерыг хураасан. Гэтэл олон нийт хүчтэй эсэргүүцсэн. Ноорог ийм алдартай гэж цагдаа нар ч мэдээгүй, бодоогүй. 

Тэд Ерөнхий сайдын гэр бүлийн даалгаврыг л биелүүлэх гэж оролдсон. Тэгтэл нэг гишүүн нь цахим мөрийтэй тоглоомд холбогдсон байж таарлаа.            

Одоо хаашаа чиглэсэн бэ гэвэл ХЗДХ-ийн сайд О.Алтангэрэл хэвлэлийн эрх чөлөөнд халдаж байгаа мэтээр, нэг хүн рүү дайрч мэдээлэл түгээж, гуйвуулж байна. Тийм биш, өмнө нь ч ийм л байсан. Х.Нямбаатар ХЗДХ-ийн сайд байхдаа самбар дээр зурж байгаад, төлөвлөөд саатуулдаг байв. Б.Энхбаяр сайдын үед ч энэ "уламжлал" хадгалагдсан. Одоогийн сайд үүнийг халах уу? Тав хоночихлоо, яагаад тоног төхөөрөмжийг нь өгөхгүй байгаа юм?

Хэд хоног хуулах гэсэн юм бэ? 

Өнөөдөр энэ хэлэлцүүлгийг зохион байгуулсан Д.Цогтбаатар даргад маш их баярлалаа. Хэн биднийг талцуулж  байгааг бид нэр устай нь маш сайн мэднэ. Энэ улсыг удирдаж буй хүмүүс ахим сүлжээг давж харахаа больсон. Тэнд юу байгаагаар нийгмээ хардаг болчихсон. 

Биднийг тэр хүмүүс удирддаг. Цагдаагийн даргыг хэн томилдог вэ? Ерөнхий сайдын санал болгосноор УИХ томилсон биз дээ. Өчигдөр нэг залуу лайв хийв. 9 тэрбум төгрөг нэг дансаар оржээ. Цагдаагийн алба хаагч сар бүр 75 сая төгрөг авдаг байсан гэж ярив. Энэ мөрийг мөшгөж, илрүүлэх ёстой. Хууль хүчний дэмжлэггүйгээр ийм том хэрэг гарахгүй шүү гэв.