Хөнгөн цагааны үнэ 2022 оноос хойших өндөр дүнгээр өсөв.

Дональд Трампын ган, хөнгөн цагааны импортод 25 хувийн татвар ногдуулах шийдвэр санхүүгийн зах зээлд тодорхойгүй байдал бий болгоод зогсохгүй таваарын захад хүчтэй нөлөөлж эхэллээ. Тухайлбал: алтны үнэ унц нь 2955 ам.доллар болж, бүх цаг үеийн дээд түвшинд хүрээд байна.

Дональд Трампын тарифын бодлого, геополитикийн нөхцөл байдлын улмаас найдвартай хөрөнгө оруулалтын эрэлт нэмэгдэж, үнэ нь өнгөрсөн долоо хоногт 2.2 хувиар өсөөд байсан юм. Алтны үнэ энэ он гарсаар 11 хувиар өсөөд байна.

Улс орнуудын Төв банкнууд алт худалдан авалтаа нэмэгдүүлж байгаа нь үнэд нь дэмжлэг болж байгаа аж. Тухайлбал: БНХАУ-ын Төв банк алтны нөөцөө гурван сар дараалан нэмэгдүүлээд байгаа юм.

Харин АНУ-ын зах зээлд хөнгөн цагааны үнэ 2022 оноос хойш байгаагүй өндөр дүнгээр өсөөд байна. Үүнд Канад улс хамгийн их өртөхөөр байгааг шинжээчид онцоллоо. Энэ онд хөнгөн цагааны гарц тааруу байснаар зах зээл эргээд хомсдолд орно гэж тооцоолж байна.

Үүнээс гадна сүүлийн дөрвөн долоо хоногт байгаагүй өндөр дүнгээр өсөөд байсан газрын тосны үнэ харьцангуй тогтворжлоо. Даваа гарагийн арилжаагаар хоёр орчим хувиар өссөн WTI төрлийн газрын тос баррель нь 72.36 ам.доллароор арилжаалагдаж байгаа бол брент төрлийн газрын тос баррель нь 75.98 ам.доллар болоод байна.

П.Түмэнзаяа