Нийслэлийн хүн амын тоо 1.8 саяд хүрчээ. Түр оршин суугчидтайгаа нийлээд хоёр саяд хүрдэг. Гэвч эрчим хүчний эх үүсвэрийн дутагдалд орж, өнгөрсөн онд цахилгаан хязгаарласан.

Тэгвэл энэ онд цахилгааны сацуу дулааны хязгаарлалт хийж болзошгүйг эрчим хүчний салбарынхан анхааруулсан юм.

Хотын шинэ удирдлага өнөөдөр  сэтгүүлчдэд ирэх дөрвөн жилд хийх ажлуудаа танилцуулав.

2028 он хүртэл дэд бүтцийн, зам тээврийн хэд хэдэн төсөл хэрэгжүүлнэ гэв. Эдгээрт Тавдугаар цахилгаан станц барих ажил багтжээ. Олон жил дуншсан энэ төслийг хувийн хэвшлийнхэн хамтран барих боломжтой гэж MCS группийн ТУЗ-ийн дарга Ж.Оджаргал Монголын эдийн засгийн чуулганы индэр дээрээс мэдэгдэж байв.

Хотын дарга Х.Нямбаатар “5-р станцын ТЭЗҮ-ийг боловсруулж дууссан. 2-р цахилгаан станцын хашаан дотор, үнсний талбайд байгуулна. Одоо Засгийн газраас зөвшөөрөл авна. Сонгон шалгаруулалтыг ирэх оны эхээр зарлана. Энэ төслийг нийслэлийн Засаг даргын нэгдүгээр орлогч Т.Даваадалай хариуцна” гэв.

300 МВт-ын хүчин чадалтай энэ станцын ТЭЗҮ-г БНХАУ-ын “Чайна энержи” компани хийжээ.

Бөөрөлжүүтийн цахилгаан станцыг өнгөрсөн сард ашиглалтад оруулсан. Улсын комиссын баг станцын эхний 150 МВт-ын хэсгийг хүлээж авахаар ажиллаж байгаа аж. Ингэснээр тус станц ирэх сараас Төвийн эрчим хүчний системд бүтээгдэхүүнээ нийлүүлж эхэлнэ.