Улаанбаатар хотын төвлөрлийг сааруулах зорилготой “Хүннү хот”-ын төлөвлөлтийн үзэл баримтлал боловсруулах олон улсын нээлттэй сонгон шалгаруулалтын бүртгэл наймдугаар сарын 4-ний өдрийг хүртэл үргэлжиллээ. 

Хүннү хотын төлөвлөлтийн үзэл баримтлалыг боловсруулахаар дэлхийн 21 орны шилдэг 43 мэргэжлийн баг бүртгүүлж, өрсөлдөхөөр боллоо.

Бүртгэл баталгаажуулсан улсуудыг бүс нутгаар нь авч үзвэл Ази тивийн 8 улс, Европ тивийн 9 улс, Хойд Америк тивээс 3 улс, Австрали тивээс 1 улс тус тус бүртгүүлсэн байна.

Хүннү хот нь Монгол Улсын ирээдүйн хөгжлийн чиг хандлагыг тодорхойлох, олон улсын жишигт нийцсэн дагуул хот байх бөгөөд:

• Засаг захиргааны шинэ төв,
• Эдийн засгийн чөлөөт бүс,
• Тээвэр, логистикийн нэгдсэн төв,
•  Их дээд сургуулиудын цогцолбор,
• Өндөр технологийн хөгжлийг дэмжих тусгай бүс зэрэг чиг үүрэгтэйгээр төлөвлөх юм.

Түүнчлэн Хүннүгийн түүхэн өв, соёлыг орчин үеийн ухаалаг, ногоон, нүүрстөрөгчийн бага ялгаралттай хот байгуулалтын шийдлүүдтэй хослуулсан, НҮБ-ын Тогтвортой хөгжлийн зорилтуудтай уялдсан ирээдүйн хот болгохоор зорьсон билээ.