Нийслэлийн Түргэн тусламжийн төвийн баг Хүй долоон худагт ажиллаж байна. Тус төвийн дарга С.Ариунболдоос зарим зүйлийг тодрууллаа.

-Нийслэлийн Түргэн тусламжийн төвийнхөн Хүй долоон худагт ямар зохион байгуулалтаар ажиллаж байна вэ. Унаач хүүхдүүдийн эрүүл мэндэд тулгамдсан асуудал гарав уу?
-Үндэсний их баяр наадмын хурдан морины уралдаан өчигдөр хязаалан, шүдлэн морьдын уралдаанаар эхэлсэн. Нийслэлийн Түргэн тусламжийн төв 7-р сарын 10-13-ныг дуустал нийт зургаан автомашин, зургаан эмчтэй үйл ажиллагаа явуулж байна.

Хоёр үндсэн чиглэлээр үйл ажиллагаа явуулж байна. Нэгдүгээрт, Хүй долоон худагт ирж буй наадамчин олны эрүүл мэндийн тусламж, хоёрдугаарт хурдан морины унаач хүүхдүүдэд яаралтай тусламж үзүүлэх чиглэлээр 24 цагаар ажиллана. Хоёр баг буюу хоёр эмч, хоёр жолооч Хүй долоон худагт жижүүрлэн хонож ажиллана. 



Энэ жилийн баяр наадмаар хуурайшилт ихтэй байна. Сая азарганы уралдаанд харьцангуй цөөн азарга уралдсан ч маш их тоостой байна. Тоосжилт ихтэй үед хүүхдүүд мориноос унах эрсдэл  нэмэгддэг. Азарганы уралдаанд нэг хүүхэд мориноос унасан. Хоёр хүүхэд морины хөл нь гэмтсэн учир мориноосоо буусан. Мал эмнэлгээс моринд нь үзлэг хийсэн.

-Өчигдрийн шүдлн, хязаалангийн уралдаанд хүүхэд мориноос унасан уу?
-Шүдлэнгийн уралдаанд гурав, хязаалан насны уралдаанд дөрвөн хүүхэд мориноос унасан. Хоёр хүүхдэд онош тодруулахаар Цэргийн төв эмнэлэгт шилжүүлсэн. Хүй долоон худагт Цэргийн төв эмнэлэг ажиллаж, ЭХО, рентген ажиллуулж тархины болон бусад гэмтлийг газар дээр нь оношилж байна.