Богд Хааны Ордон Музей Олон улсын музейн өдрийг тохиолдуулан “Богдын Хайстайн Лаврин ба ээдрээт түүх” сэдэвт гэрэл зургийн үзэсгэлэнг толилуулна. 

Тус үзэсгэлэн нь Богд хааны ордон музейн Амгалан энхийн хаалганы өмнөх ёслол хүндэтгэлийн талбайд 2017 оны тавдугаар сарын 18-нд үзэгч олны хүртээл болох ба нээлтийн ажиллагаа 18:00 цагт эхлэнэ.  

Хайстайн Лаврин буюу Улаан ордон нь VIII Богд Жавзандамба хутагтын үед XIX зууны эцэс, XX зууны эхэн үед Туул голын сав газар өндгөн сүргийн бэлчээр нутагт байгуулагдсан зуны ордон юм. Үзэсгэлэнгийн нээлтийн үеэр тус ордны тухай ээдрээт түүхийг хөндхөөс гадна энэ ордны өнгөрсөн түүх, төрх хийгээд өнөө цагт хэрхэн оршин байгааг харах аж. 

Эрдэнийн далай баян сүм буюу ард олны дунд Хайстай Лаврин, Хайлаастайн ордон гэх зэргээр нэрлэгддэг байсан уг ордон нь Богд Хааныг жанч халтал ихээхэн өргөжин тэлж байжээ. Богд хаан 1924 онд жанч халснаар уг ордныг тухайн үеийн Намын дээд сургуулийн харьяанд шилжүүлсэн бөгөөд ихэнх барилгууд нь үгүй болжээ. 

Олон улсын музейн өдрийг 1977 оноос эхлэн жил бүрийн тавдугаар сарын 18-ны өдөр дэлхийн даяар тэмдэглэж ирсэн бөгөөд манай оронд 1998 оноос тэмдэглэж заншжээ. Олон улсын музейн зөвлөл /International Council of museums - ICOM/ -өөс жил бүрийн сэдвийг тодорхойлон чиглүүлдэг онцлогтой ба энэ жил “Музей ба ээдрээт түүх: нээлттэй ярилцъя” сэдэв дор зохион байгуулагдах аж. 

Түүх, соёлын дурсгалыг авран хамгаалах уриан дор зохиогдож буй уг үзэсгэлэнг амтат кофегоор дайлахаар “Арума” ХХК, уран зураг үзэх боломжийг бүрдүүлэхээр “Wine & Canvas” event, чадварлаг залуу уран бүтээлчдээ оролцуулахаар СУИС, ШУТИС, ИЗОУИС-ийн Уран зургийн тэнхим, Усан будгийн холбоо дэмжин ажиллаж байна. 

Мөн нээлтийн үеэр та Монгол өв уламжлал, соёлыг түгээх зорилготой Наад брэндийн бүтээгдэхүүн болох Миний Монгол гэр буюу “МиМо гэр”-тэй танилцах боломжтой.