Гол нэрийн 6 эрдэс бүтээгдэхүүний экспортын үнийн дүн 2023 оныхоос 5 хувиар өсжээ.

Гол нэрийн зургаан эрдэс бүтээгдэхүүний экспортын үнийн дүн 2024 онд 13.2 тэрбум ам.доллар болж, өмнөх онтой нь харьцуулахад тав орчим хувиар өссөнийг Гаалийн ерөнхий газар урьдчилсан байдлаар мэдээллээ.

Өнгөрсөн онд 83.7 сая тонн чулуун болон хүрэн нүүрсийг 8.6 тэрбум ам.доллароор экспортолсон нь өмнөх оноос биет хэмжээгээр 20 гаруй хувиар өссөн ч үнийн дүнгийн хувьд хоёр орчим хувиар буурчээ.

2024 онд Монгол Улс 78 сая тонн нүүрсийг дунджаар тонныг нь 115 ам.доллароор экспортлохоор төлөвлөөд байсан юм. Биет хэмжээний хувьд зорилгоо давуулан биелүүлсэн ч үнийн хувьд тонныг нь дунджаар тонныг нь 103 орчим ам.доллароор экспортолжээ.

Харин 2025 онд 83 сая тонн нүүрсийг тонныг нь дунджаар 105 ам.доллароор экспортлохоор тооцож, төсвийн орлогоо төлөвлөөд байна. БНХАУ-ын эдийн засгийн нөхцөл байдлаас шалтгаалан 2025 онд нүүрсний үнэ 2024 оноос дунджаар 10-12 хувиар буурах төлөвтэйг Дэлхийн банк мэдээлж байсан юм. Хэрэв гадаад зах зээлд нүүрсний үнэ төсөөлснөөс хэт доошилбол төсвийн орлого тасалдах эрсдэлтэйг эдийн засагчид анхааруулсаар байна.

Бусад эрдэс бүтээгдэхүүний хувьд 3.3 тэрбум ам.доллароор 1.6 сая тонн зэсийн баяжмал экспортолсон нь өмнөх оныхоос 26 орчим хувиар өссөн үзүүлэлт боллоо.

2025 онд “Оюутолгой”-ийн гүний уурхайн алт, зэсийн агууламж өндөртэй олборлолт нэмэгдсэнээр нүүрсний үнийн бууралтыг нөхөх магадлалтайг Дэлхийн банк тодотгож байв.

Харин хайлуур жонш, төмрийн хүдэр, түүхий нефтийн үнийн дүн өмнөх 2023 оныхоос өссөн үзүүлэлттэй байна.