ХӨСҮТ-ийн захирал Б.Анхбаяр дараах мэдээллийг өгөв. 

-Энэ онд менингококкт халдварын дөрвөн тохиолдол бүртгэсэн. Хоёр нь гэртээ цаг алдсан тул эмч нар аварч чадаагүй. Архангай аймагт таван настай хүүхэд эндсэн харамсалтай тохиолдол гарлаа.

Ээж аавууд хүүхдээ сайн анхаарч, шинж тэмдгийг тандаж байгаарай. Хүүхдийн бие дээр тууралт гарах нь хамгийн сүүлд буюу хүндэрсэн хойно илрэх шинж тэмдэг юм.  Үүнийг мэддэггүй ээж аавууд бие дээр нь юм туураагүй гээд тайван ханддаг.

Өндөр, огцом халуурах, удаан хугацаагаар халуурах, толгой өвдөх, хүүхэд цочир уйлах, тасралтгүй бөөлжих, гэдсээр өвдөх, гэрэлд цочрох нь энэ халдварын илрэх шинж тэмдгүүд юм.  Эдгээр шинж тэмдэг илэрвэл эмнэлэгт хурдан хандвал хүүхдийг аварч болно.

Манай улсад хамгийн сүүлд 2019 онд энэ халдварыг бүртгэсэн. 5-6 жилийн дараа халдвар дахидаг онцлогтой. Ээж аавууд эрүүл мэндийн байгууллагуудын мэдээллийг байнга авч байхыг зөвлөе гэв.