Ерөнхийлөгч У.Хүрэлсүх "Алт 3" хөтөлбөр байгаль орчинд сөрөг нөлөөтэй хэмээн хэсэгчилсэн хориг тавьжээ.

Энэ хөтөлбөрөөр алт олборлолтыг нэмэгдүүлж, улмаар гадаад валютын нөөцийг нэмэх, төгрөгийн ханшийг тогтворжуулна гэж өмнөх Засгийн газар шийдсэн. УИХ 2025 оны долоодугаар сард тогтоол баталсан юм.

УИХ-ын намрын чуулганы нэгдсэн хуралдаан өчигдөр эхэлж, УИХ-ын гишүүд Ерөнхийлөгчийн хоригтой танилцжээ. Энэ талаар Төсвийн байнгын хорооны хуралд оролцогчид хэлэлцэв. Хоригт "Байгаль орчныг хамгаалах төрийн бодлогыг тууштай хэрэгжүүлэх ёстой. "Алт 3" хөтөлбөрийг тусгай хамгаалалттай газар нутагт хэрэгжүүлж болохгүй" гэжээ.

УИХ-ын гишүүн Г.Ганбаатар "Би ерөнхийлөгчийн хоригийг дэмжиж байна. Энэ хөтөлбөрийн байгаль орчны нарийвчилсан үнэлгээг хийсэн үү" гэж асуув.

ЕТГ-ын дарга А.Үйлстөгөлдөр "Алтны тусгай зөвшөөрлүүд багадаагүй юм билээ. Алтны 80 гаруй үндсэн орд бий. Эдгээрээс 14 ордод л олборлолт хийсэн. Үлдсэн ордууд эдийн засгийн эргэлтэд ороогүй.

Эдгээрт нийт 230 тонн алтны нөөц бий. Эдгээр ордыг ашиглахын тулд эрх зүйн орчныг сайжруулж, компаниудын дарамтыг багасгая. Гаднын хөрөнгө оруулалт татах боломжтой. Нэгэнт олгосон тусгай зөвшөөрлөө эхлээд ашиглах нь зөв. Ийм байтал тусгай хамгаалалттай, дархан цаазат газрууд, голын ай савд алт олборлож болохгүй. Төрийн тахилгатай газарт ч алт олборлох аюул бий. Харин хариуцлагатай уул уурхай, эрэл хайгуулыг Ерөнхийлөгч дэмжинэ." гэв. 

Байнгын хорооны хуралдаанд оролцсон гишүүдийн олонх хоригийг хүлээн авах нь зөв гэв. Энэ асуудлыг УИХ-ын чуулганы нэгдсэн хуралдаанд эцэслэн шийднэ.